Siviilasuodjalusas muitalit mannan ija lea 3-4 sajis fas buollán Beaivvášgietti lahka Kárášjoga gielddas maid sii čáskadedje.
Siviilasuodjalusas muitalit mannan ija lea 3-4 sajis fas buollán Beaivvášgietti lahka Kárášjoga gielddas maid sii čáskadedje.
Siviilasuodjalusa fákta Ivar Franzen, Kirkonjárggas, muitala gaskavahku iđđes ahte sii leat ija fákten guovllu gos sii leat čáskadan meahccebuollima.
– Eana lea nu goikkis ja dán ija finaimet čáskadeamen buollima 3-4 sajis go hilat lea cahkkán eatnamis ja fas buollán. Lei davvenuorttas gos čáskadeaddjit eai leat fitnan čáhcebohcciiguin čáskadeamen buollima. Eat mii leat vuos sihkkar ahte buot lea jáddaduvvon. Dál ovcci áiggi bohtet čáskadeaddjit Leavnnjas ja Gilevuonas deike, vai olbmot besset vuoiŋŋastit, lohká Siviilasuodjalusa fákta Ivar Franzen Kirkonjárggas ja lohká sii fertejit máŋga beaivvi ain fáktet amas ii dolla fas buollá go hilat sáhttet cahkkámin eatnamis.
Dollačáskadeaddjit váiban
Kárášjoga gieldda gaskaboddosaš buollinčaskadeaddjihoavda lea Frank Rune Ellingsen gii hovde Hámmárfeasttas buollinčáskadeaddjiid Kárášjogas.
Gaskavahkku ovdalgaskabeaivvi muitala son ahte dál bohte buollinčáskadeaddjit Leavnnjas ja Gilevuonas geat galget joatkit buollinčaskadeami. Lea 8 olbmo, 7 siviilasuodjalusas ja 1 buollinčáskadeaddji. Sii bohtet Leavnnjas ja Gilevuonas.
– Mii fertet dál fuolahit ahte ii buollá ođđasit ja buole viidábut. Sáhtet ain leat hilat eatnamis cahkamin. Dál lea buollán 300×400 mehtera, muitala Ellingsen.
– Jándor geahčen, duorastaga, bohtet dollačaskadeaddjit, lea Tromssa siviilasuodjalusa olbmot geat bohtet. Mis eai leat doarvái olbmot ja dat mat leamaš mielde buollima čáskadeamis, leat váiban dál.
Geahččalit eastadit leavvamis
Hástalus dás dohko lea ahte guovlu gos lea buollán, ii stuoro, go sáhttá fas buollát. Sáhttá leat hui čiekŋalit buollán.
Bajit oassi eatnamis sáhttá leat njuoskan, muhto eana vuollelabbos sáhttá leat hirbmadit goikan.
– Lea duohta, hilat sáhttet cahkat ruohttasiin. Bajit oassi eatnamis sáhttá leat njuoskkas, muhto vuollelis sáhtá eana leat goikkis ja sáhttá buollát fas. Jus dohko boahtá eambbo áibmo, de sáhttet hilat buollát, eat ge mii oainne dan. Hilaid mat leat cahkamin eatnamis, lea váttis časkadit, ja daid mii fertet fáktet ahte eai buollá, dassážii go lea jaddan, čilge Ellingsen, guhte čohkká Hammerfeasttas ja hovde čáskadanbarggu.
– Lea dieđihuvvon ahte galgá biekkastit ja de fertet sávvat ahte ii šatta midjiide giksin. Mii geahččalat doalahit buollima das gos lea, dassažii go ođđa čáskadanveahka siviilasuodjalusa boahtá duorastaga iđđedis. Dál doaivut ahte arvá nu mo meteorologat lohket, ahte arvá bearjadaga eahket ja lávvardaga. Lea dieđihan olu arvvi, lohká Ellingsen.
