Ávjovári Luonddugáhttenlihttu bovde rabas seminárii gos áigot ságastallat Finnmárkku suodjalanguovlluid.
Ávjovári Luonddugáhttenlihttu bovde rabas seminárii gos áigot ságastallat Finnmárkku suodjalanguovlluid.
– Dárbbašit go mii suodjalanguovlluid Finnmárkkus, jearrá Ávjovári Luonddugáhttenlihttu seminára bovdehusas.
Dat lea ge fáddán go lihttu čoaggana seminárii Kárášjohkii lávvordaga njukčamánu 4. beaivvi.
– Manne hilgot álbmotmeahci?
Luonddugáhttenlihttu jearrá manne Fylkkadiggi, FeFo, Sámediggi ja suohkanat hilgo 2010:s go stáhta háliidii álggahit ja viiddidit álbmotmehciid ja luonddureserváhtaid Finnmárkkus.
– Lea go nu ahte lullidážat háliidit suodjalit min meahci, muhto meahcásteaddjit Finnmárkkus háliidit bilidit dan? Vai gávdno go eará čilgehusat? Dál lea stáhta fas pláneme álggahit 23 ođđa luonddureserváhtaid Finnmárkui, jearrá lihttu.
Háliidit iešguđet oainnuid
Vuosttaš oasis semináras digaštallet álbmotmeahccestivrraid suodjalanperspektiivvaid. Nuppi oasis lea luonddugeavaheddjiid suodjaleapmi, ja Luonddugáhttenlihttu guovddášstivrra lahttu Kjell Derås gii muitala.
Boazoeaiggát, Peer Gaup, muitala boazodoalu vásáhusa Ráissa álbmotmeahcis.
Semináras jerro maid manne Kárášjogas eai hálit viiddidit bajit Anárjoga álbmotmeahci, ja Kárášjoga várresátnejođiheaddji John Nystad muitala. Semináras leat njeallje oasi oktiibuot.
