Álgoálbmot filbmafestivála Skábmagovat čilge boahtte jagi festivála fáttá ja plakáhta.
Skábmagovat filbmafestivála lágiduvvo ođđajagimánus 2023 Anáris ja dan fádda lea gievrras nissonat. Dá lea 25. geardde go festivála lágiduvvo.
– Dás čakčat go ođđajagimánu festiválaprográmma álggii hápmašuvvat, de fuomášeimmet ahte stuora oasis ealligovain mat bohtet midjiide ledje gievrras nissonat jogo bagadallin dahje ahte ealligovat muitaledje gievrras nissoniid birra. Duot fáddá lea guhká leamašan mielas ja orui dál heivemin lunddolaččat jagi 2023 festivála váldofáddán, muitala Skábmagovaid dáiddalašjođiheaddji, Jorma Lehtola.
Geasuheaddji dáiddár
Skábmagovat festiválahoavda Aleksi Ahlakorpi lohká filbmafestiválii lea dehálaš loktet sihke filbmabuvttadeddjiid ja eará báikkálaš dáiddáriid oidnosii.
Festivála plakáhta lea nuortalaš dáiddár Janika Sieppi hábmen. Festivála bargit gávdne dáiddára Instagram bokte.
– Muhtumat min bargojoavkkus čuvvo Sieppi Instagramprofiilla ja mii mearrideimmet jearrat sus livččego beroštuvvan hábmet midjiide plakáhta, muitala festiválahoavda preassadieđáhusas.
Ahlakorpi lohká Sieppi govat leat sihke njuorasmahtti ja gievrrat ja ahte su stiila heive bures festivála fáddái.
