Ofelaččain leamaš erenomáš bargovahkku, go leat beassan logaldallan sámiid birra ON`a internašunála skuvlla ohppiide. Sii čuvvot ON`a bistevaš eamiálbmotforuma New Yorkas.
Dán vahku leat ofelaččat čuvvon ON`a bistevaš eamiálbmotforuma New Yorkas. Lea maid goalmmát jahki maŋŋálagaid go ofelaččat leat logaldallan sámiid birra ON`a internašunála skuvlla ohppiide gos vázzet mánát geat bohtet miehtá máilmmi go sin váhnemat barget ON`a vuogádagas.
Besse geahččalit juoga eará
Maiddái dán jagi daid skuvlaluohkáin gos ofelaččat logaldalle ledje Norgga, Suoma ja Ruoŧa mánát. Sidjiide lei erenoamáš dehálaš gullat ja oahppat eanet sin iežaset riikkaid eamiálbmogiid birra.
– Mii leat dál johtán jo guhkká Norggas ja logaldallan sápmelaččaid birra skuvllain ja lei hui somá go beasaimet geahččalit juoidá eará. Logaldallat eŋgelasgillii lei ođas midjiide ja maiddái go fertiimet eará láhkai plánet ja čilget áššiid, lohká ofelaš Sárá Márjá Utsi preassadieđáhusas.
Sámi ofelaččat leat ON`a internašunála skuvlla ohppiide logaldallan sámiid birra. Govas oaidnit Yvonne Marie Miniggio (gurut) ja Sárá Márjá Utsi. Preassagovva.
Bovdejuvvon boahtte jagi maid
Sámi allaskuvlla lea duđavaš dainna ahte dán jagi besse deaivat maiddái skuvlla rektora guhte sávai ahte ovttasbargu joatkašuvvá ja ahte ofelaččat finašedje galledeamen sin skuvlla ohppiid maiddái čuovvovaš jagi.
– Mii vásihat dáppe eamiálbmot forumas ahte eará eamiálbmogat leat hui beroštuvvan min diehtojuohkindoaimmas ja háliidit diehtit eanet min doaimma birra, muitala ofelašdoaimma jođiheaddji Risten Länsman. Ofelašdoaibma lágiidage ovttas Gálduin oalgedáhpáhusa mas eamiálbmogat ieža muitalit iežaset kultuvrra birra. Dán dáhpáhussii lea maid Asia eamiálbmotjoavkku ovddasteaddji Joan Carling bovdejuvvon muitalit iežaset diehtojuohkima birra.