-Almmuhus-
OĐĐASATČállinrávagirji dohkkehuvvon davvisámegiela várás

Čállinrávagirji dohkkehuvvon davvisámegiela várás

-

-

– Sávvamis čállinrávagirji šaddá stuorra ávkin buohkaide geat čállet sámegillii, lohká Sámedikki presideanta Aili Keskitalo preassadieđáhusas.

Sámediggi lea ođasmahttán ovdal almmuhuvvon Čállinrávagirjji davvisámegiela várás maid Sámediggi buvttadii 2003:s, ja dan lea Giellagáldu davvisámi giellajuogus dohkkehan cuoŋománu 13.b. 2016.

 

Bargan golbma jagi

Sámediggi nammadii bargojoavkku mii lea bargan dáinna čállinrávagirjjiin sullii golbma jagi. Bargojoavkkus leat leamaš mielde Sámi allaskuvlla giellaprofessorat, Sámedikki giella- ja oahpahusossodaga bargit, jorgaleaddji, journalista, oahpaheaddji ja sámeskuvlla rektor.

 

Deháleamos rávvagat

Riektačállinrávvagat-girjjážis leat dábáleamos čállinrávvagat mielde, earret eará nu go gaskamearkkaid geavaheapmi, movt rihkku, čuokkis, golbma čuoggá, beallečuokkis, gažaldatmearka, čuorvvasmearka, finjusáhcu ja eará čállinmearkkat galget adnot.

Das leat maid eará merkenvugiid birra rávvagat, nu go apostrofaid, juolgenohtaid, proseanttaid ja maid mearkkaid gaskka geavaheami birra.

Girjjážis gávdná maid vástádusaid dábáleamos gažaldagaide, earret eará vierissániid ja loatnasániid geavaheami birra, sátnejuohkima birra, álgobustávaid birra (goas stuora ja goas unna álgobustávva geavahuvvo), beaivádeami birra, loguid, goallossániid ja laktapartihkkaliid birra. Girjjážii leat maid váldán mielde rávvagiid movt davvisámegiela oanádusat adnojit, ja oanáduslisttu.

– Sámediggi oinnii dárbbu ođasmahttit Čállinrávagirjji, go ovddit veršuvnnas ledje ollu boasttuvuođat, váilivuođat, ii ge lean nu álki geavahit, muitala Sámedikki presideanta Aili Keskitalo. Dál leat divodan dan ođđaseamos normeremiid mielde.

 

Ávkin buohkaide geat čállet sámegillii

– Girjjáš ii leat dievaslaš, ii ge várra šatta nu guhká go mis lea ealli giella, muhto buori muddui doaivut mii ahte dat boahtá ávkin buohkaide geat čállet sámegillii, nu go studeanttaide, skuvlamánáide ja –nuoraide, jorgaleddjiide, oahpponeavvuid buvttadeddjiide, journalisttaide, byrokráhtaide ja earáide geat čállet sámegillii, lohká Keskitalo.

Girji almmuhuvvo vuosttažettiin interneahtas, muhto deaddiluvvo maid farggamusat.

Áiggi mielde soitet boahtit rievdadusat, nu go jus juoga ođđasit normerejuvvo davvisámegillii, mii guoská dán girjjáža sisdollui. Dán čállá Sámediggi preassadieđáhusas.

-Almmuhus-