Lea geasuheaddji leat meahcástallanolmmožin, nu navdet goit «dating» birrasis. Eahpeformálalaš dutkamis čájehuvvo ahte golmmas viđa olbmos geavahit meahcástallama fidnemis «date».
Olu ráhkisvuođa ohcamis geavvá dán áigge datingáppaid bokte, ja orru leame ahte meahcástallan lea badjin listtus go ohcalit ođđa guoimmi. Eahpeformálalaš dutkan, man lea dahkan Norsk Friluftsliv, čájeha ahte golmmas viđa olbmos čájehallat iežaset meahcástallanberoštusa vai fidnejit «date».
– Lea kultuvrraš ja positiivvalaš árvvuin sáhka
Norsk Friluftsliv váldočálli, Lasse Heimdal, ii imaš dan bohtosa.
– Dan dihte go lea lassánan berošteapmi meahcástallamii maŋimuš jagiid, de in imaš daid loguid. Midjiide norgalaččaide lea meahcástallan kultuvra ja positiivvalaš árvvut. Nu ahte go ovdanbuvttát dus lea beroštupmi meahcástallamii, dovddahat don nubbái ahte don válddát vára dearvvašvuođas, dadjá Heimdal.
Meahcástallanberoštus orru geasuheaddji
Ovdandoallat iežas «meahcástallanolmmožin» orru leame hui geasuheaddji, ja orru leame dehálaš ágga ahte leat dearvvašlaš ja falli «dating» oktavuođas.
Čájehuvvo 500 Norgga gaskal 19–50-jahkásaččaid datingprofiillain ahte lagabui 60 proseantta ovdandollet meahcástallama govain dahje dieđuin iežaset birra. Lea dássálaga nissoniid ja albmáid gaskka geat ovdandollet ahte lea meahcástallanberoštupmi.
– Olusat galggaše deaivvadit luonddus, go mii diehtit ahte ságastallamat mannet njuovžilabbot go leat olgun ovttastallamin. Manne ii bovdet kajakktuvrii, oagguntuvrii dahje meahccetuvrii vuosttaš deaivvadeamis? Mu vuosttaš deaivvadeapmi iežan eamidiin lei kanotuvra, ja moai letne leamaš náittosdilis 34 jagi, muitala Heimdal.
