-Almmuhus-
-Almmuhus-
-Almmuhus-
KULTUVRAČállán mánáid­girjji mátta- ja davvi­sámegillii

Čállán mánáid­girjji mátta- ja davvi­sámegillii

-

-

Iđut lágádus almmuha Lajla Mattson Magga viđát mánáidgirjji Tjïrrh / Čebo mátta- ja davvisámegillii. 

Davviriikkalaš- sámi Gollegiela 2010 bálkkašumi vuoiti, girječálli Lajla Mattson Magga, lea čállán mánáidgirjji guovtti sámegillii, mátta- ja davvisámegillii, dieđiha Iđut lágádus preassadieđáhusas.

Nu mo girjji namma, Tjïrrh / Čebo, muitala, de lea girji Čebu ja guokte máná birra, oappá Læjsa ja vielja Pïere birra. Muitalus álgá go Pïere čuorvu Tjïrrh / Čebo beatnagii ahte galgá boahtit vai oažžu dávtti maid sáhttá jursit. Muhto Tjïrrh / Čebo ii oidno gostige. Gosa lea Tjïrrh / Čebo mannan? Oabbá Læjsa veahkeha vieljas ohcat beatnaga. 

OLGGOŠ: Ane Tollerød Fosse lea sárgon govaid Lajla Mattsson Magga girjái: Tjïrrh / Čebo. Govva: Iđut lágádus
OLGGOŠ: Ane Tollerød Fosse lea sárgon govaid Lajla Mattsson Magga girjái: Tjïrrh / Čebo. Govva: Iđut lágádus

Giellaáŋgirdeaddji

Lajla Mattson Magga lea riegádan skápmamánu njealját beaivvi 1942 Kall báikkis Åre gielddas Jämtlánddas Ruoŧas. Son lea máttasámi oahpaheaddji, čállá mánáidgirjjiid, jorgala girjjiid máttasámegillii ja lea leksikográfa.

Soai isidiin, Ole Henrik Maggain, ássaba belohahkii Guovdageainnus ja belohahkii Åres.

Lajla Mattson Magga, Ole Henrik Magga ja Knut Bergsland almmuhedje ovttasráđiid Åarjelsaemien– daaroen baakoegærja / Sydsamisk– norsk ordbok 1993:s. 2009:s almmuhii Mattson Magga Norsk–sydsamisk ordbok / Daaroen– åarjelsaemien baakoe gærja, mii lea vuosttaš stuorra dárogiel-máttasámegiel sátnegirji mii lea almmuhuvvon.

Jagi 2016 almmuhii girjji Mojhtesh (muittut), mas boarrásat máttasápmelaččat muitalit dološ áiggi muitalusaid.

Lajla Mattsson Magga almmuhii su vuosttaš mánáidgirjji loahpageahčen 1970-logu ja jagi 2008:s almmuhii mánáidgirjji Meerke, ja Tjïrrh / Čebo lea su viđát mánáidgirji. Lágádus Iđut almmuha mánáidgirjji ja Sámediggi lea ruhtadan girjji almmuheami. 

-Almmuhus-