Measta juohke guđát vázzi logi vázzis leat seavdnjadin vásihan váralašvuođa johtolagas, muhto liikká lea dušše okta logis gii muitá geavahit álot šleđggona.
Measta juohke guđát vázzi logi vázzis leat seavdnjadin vásihan váralašvuođa johtolagas, muhto liikká lea dušše okta logis gii muitá geavahit álot šleđggona.
Dan čájeha ođđa iskkus máid Kantar TNS lea dahkan Trygg Trafikk ja SpareBank 1 Dáhkádusa ovddas dan olis go ikte lei «šleđggonbeaivi».
Dan iskosis maid muitalit 42 proseantta jerron olbmuin, ahte sii leat leamaš mielde biillas dahje ieža vuodján biillain go leat measta vuodján olbmo njeaiga seavdnjadis.
– Min iskkadeapmi čájeha ahte čuožžilit beare ollu váralašvuođat go vázzit eai oidno seavdnjadis. Dat ráfehuhttá min, erenoamážit go eanemus olbmot vuddjojit golggotmánu rájes ođđajagimánu rádjái, dadjá Trygg Trafikk gulahallanhoavda Ann-Kathrin Årøen preassadieđáhusas.
Govva: Colourbox
Muittohis norgalaččat
Dan varas iskkadeamis bohtet ovdan ollu lágan ákkat, manne eai geavat šleđggoniid, muhto eatnasat, namalassii 72 proseantta dadjet ahte sii eai muitte geavahit šleđggona.
– Vajálduhttit šleđggona lea seamma go válljet leat oaidnemeahttumin seavdnjadin, ja vázzi olmmoš lea váralaš dilis jus biilavuoddji ii oainne su. Šleđggon lea danne buoremus dáhkádus seavdnjadin, dadjá SpareBank 1 Dáhkádusa vaháteastadeaddji Therese Nielsen dan seamma preassadieđáhusas.
Govva: Trygg Trafikk/ Reflexprodukter
Dušše okta logis geavaha álot šleđggona
Vaikke dušše okta logis álo geavaha šleđggona, de vástidit 88 proseantta jerron olbmuin ahte livččii hirbmat ávki jus eambbosat geavahivčče šleđggona. Dasa lassin dadjet 96 proseantta ahte vázzi geas ii leat šleđggon, lea váttis oaidnit seavdnjadin.
– Lea paradoksa go mii ipmirdat ahte šleđggonis lea ávki, muhto liikká eat geavat dan. Geavahit šleđggona berre šaddat seamma lunddolaš go biilaboahkána geavahit. Gidde šleđggona reddjui máid geavahat vai leat ráhkkanan dasa, go sevnnjoda olgun, dadjá Årøen loahpas.
