Lohku lea beliin unnon diimmá ektui ja goalmmát jahkenjealjádasas leat 97 olbmo duššan johtolagas Norggas.
– Lossa giđa ja geasi maŋŋel, go ledje máŋga jápminlihkohisvuođa, de ledje čakčamánu logut nu mo mii leat oaidnán maŋemuš jagiid. Muhto lea goitge stuora moraš dan guđa olbmo bearrašiidda, oapmahaččaide ja servodahkii, čállá Stáhta geaidnodoaimmahaga ossodatjođiheaddji Guro Ranes preassadieđáhusas.
Čakčaluopmu – vuoje siivvu mielde ja geavat biilaboahkána
Stáhta geaidnodoaimmahat diehtá ahte dál lea máŋgga sajis Norggas leamaš čakčaluopmu dahje čakčaluopmu lea álgán.
– Mii leat gáibideaddji áigodagas dál, lea seavdnjat, gálja, arvi ja dihto báikkiin lea čoaskkis ja muohttán. Dál lea erenomáš dehálaš leat áicil go čohkkeda biilii, go sihkarvuođamunni lea unnit go muđui, čilge Ranes.
Máŋggaid jagiid mielde lea Norga leamaš buoremusaid searvvis johtolatsihkarvuođa ektui, ja leat unnán olbmot geat duššet johtolagas, ássiid ektui.
– Mis leat alla mihtut, ja dán jagi hásttuhit giđa ja geasi lihkohisvuođalogut min. Dattetge leat buorit logut, ja mii fertet geahččat 2016 loguide ovdal go gávdnat seamma olu jápminlihkohisvuođaid, muitala Ranes.
Son maid muitala ahte Stáhta geaidnodoaimmahat geahččala bargat buoremus barggu johtolatsihkarvuođa ektui, ahte Norggas galget buorit ja sihkkaris luottat ja galget čielga dieđut luottaid birra. Muhto son maid ávžžuha ahte biilavuoddjie váldšt ovddasvástádusa, ahte čuvvot leahttomeari, vudjet siivvu mielde, geavahit biilaboahkána eaige vuoje gárrenoaivvis.
