-Almmuhus-
OĐĐASAT– Čájehuvvo ahte lea olu vašši boazo­­ealáhusa vuostá, ja lea hirpmá­­stuhtti man...

– Čájehuvvo ahte lea olu vašši boazo­­ealáhusa vuostá, ja lea hirpmá­­stuhtti man vearrái dat lea

-

-

Dál bargagohtet sámevaši ja rasismma eastademiin, go boazodoallu vásiha dihto áigodagain erenomáš olu vaši. 

Norgga Boazosápmelaččaid Riikkasearvi lea ožžon ruhtadeami Boazodoalušiehtadusa 2022/2023 oktavuođas prošektii «Vaši ja rasismá boazodoalu vuostá», ja prošeaktajođiheaddji lea Anja Guttorm Graven. Son muitalii veahá prošeavtta birra masa lea várrejuvvon 800 000 ruvnno ja galgá bistit dán jagi skábemánu rádjái. 

– Čájehuvvo ahte lea olu vašši boazoealáhusa vuostá, ja lea hirpmástuhtti man vearrái dat lea, dajai Anja Guttorm Graven. 

Diehtojuohkin lea dehálaš

Prošeavtta mandáhtta lea ráhkadit reaiddu mii juohká dieđuid. Anja Guttorm Graven ii loga dan galgat lossa dokumeantan, muhto galgá álki dan lohkat. 

– Diehtomeahttunvuohta boazoealáhusa birra sáhttá dagahit vaši, ja dan sivas lea dehálaš juohkit dieđuid, logai Graven. 

Dihto áigodagas ealáska sámevašši

Nubbi mandáhtta mii lea bargojoavkkus lea ráhkadit miellaguoddokampánja ja goalmmát lea ráhkadit kampánja mii lea heivehuvvon boazojahkái. 

– Mii oaidnit ahte sámevašši ja vealaheapmi boazodoalu vuostá dáhpáhuvvá dihto áigodagas. ja okta sivva lea beroštupmi eatnamii, nu go ovdamearkka dihtii giđđat, go skohterláhtut giddejuvvojit, muitalii Anja Guttorm Graven.  Son deattuhii ahte sámevašši dávjá dáhpáhuvvá go lea sáhka beroštumiin. 

– Mii diehtit goas dat áilbmá ja dalle fertet dustet dan ovdal go dat dáhpáhuvvá, dajai Anja Guttorm Graven.  

Olles servodaga ovddasvástádus eastadit vaši

Son deattuha ahte diehtojuohkin lea dehálaš oassi prošeavttas olahit servodaga. 

– Ii leat dušše badjeolbmuid ovddasvástádus eastadit sámevaši, muhto olles servodaga. Lea doarvái dál. Lea maid gielddaid ovddasvástádus jearrat halddašeaddjis, go ii leat dohkálaš ahte sámevaši dáhpáhuvvá, logai Graven.  Son deattuhii ahte diehtojuohkin lea okta oassi rasismma eastadeamis. 

-Almmuhus-