-Almmuhus-
OĐĐASAT Čájehit Sol­turneringen spábba­čiekčamiid njuolggo­sáddagis

Čájehit Sol­turneringen spábba­čiekčamiid njuolggo­sáddagis

-

-

IL Ávju bovde fas mánáid ja nuoraid ávvudit beaivváža Solturnering nammasaš spábbačiekčamiin Kárášjogas nu go leat 1993 rájes dahkan. Dán jagi sádde Ávvir njuolggosáddaga buot čiekčamiin. 

Measta jahkásaččat 1993 rájes lea Ávju lágidan Solturneringa ja dál bovdejit fas joavkkuid ja gehččiid Niitohárjái. Dušše moatte geardde leat ferten šluhttet čiekčamiid buollašiid dihte. Ođđajagemánu maŋemus vahkkoloahpa lágiduvvo ge Solturneringa. 

Solturnering lea spábbačiekčángilvu mánáide mii bistá guokte beaivvi ja dán jagi lea vuosttaš geardde go Ávvir streame gilvvuid Ávvira neahttasiiddu bokte.

– Somá mánáide

Runar Samuelsen Ávju valáštallansearvvis lea turneringjođiheaddji, stivralahttu ja spábbačiekčanhárjeheaddji. Son lohká ahte su mielas lea somá go Ávvir sádde njuolggosáddaga Solturneringas.

– Mii sávaimet ahte Ávvir áigu streamet Solturneringa. Go sii válde oktavuođa, de attiimet dieđu ahte sii áinnas galget streamet, ja dan mii dahkat ge mánáid ovddas. Lea sihkkarit somá mánáide go sin filbmejit go leat čiekčame spáppa vai váhnemat ja muđui eará bearašlahtut, geain ii leat vejolašvuohta boahtit, besset čuovvut mielde Ávvira streamema bokte, čilge Samuelsen.

Guokte beaivvi

Solturnering álgá lávvordaga ja dalle čikčet nuoramus mánát, 7-jahkásaččain gitta 11-jahkáčaččaide. Spábbačiekčanláhtti juhkkojuvvo guovtti oassái, unna čiekčanláhttáš, mii lea goalmmádasoassi láhttis, čikčet buot nuoramusat, ja stuorebuš mánát ges čikčet dan stuorit láhttis. Sotnabeaivvi lea ges boarrásat mánáid vuorru go 13–15-jahkásaš luohkká čievččastuvvo johtui.

– Mii nagodit eanemusat váldit vuostá 49 joavkku, muhto sávvat ahte unnimus 44 joavkku servet. Jus eai gártta nu ollu joavkkut, dalle sáhttit guhkidit čiekčamiid. Muđui mii leat váldán eret daid olu bottuid mat lávejedje ovdal, ja dál leat dušše minuhtasaš bottut juohke čiekčama maŋŋel, muitala Samuelsen.

Son muitala ahte dán rádjái leat joavkkut Kárášjogas, Porsáŋggus ja Álttás dieđihišgoahtán gilvui, muhto sávvá joavkkuid sihke Guovdageainnus, Deanus ja eará guovlluin maid searvat.

– Livččii somá jus ođđa joavkkut maid searvvaše. Mis lávejit sullii 350 čiekči geat besset čiekčat unnimus njeallje čiekčama, muitala Ávjju jođiheaddji Espen Nystad ovdal go Samuelsen loahpaha:

– Mii sávvat olbmot dorjot ja bohtet Niitohárjái. Mis lea kafea gos sáhttá gávppašit, ja muđui geahččat nuorra boahttevaš spábbačikčiid.

Áŋgiruššansuorgi

Ávvir lea maŋemus mánuid sádden njuolggosáddaga, dahje streamen, sihke Ávvir Cupa ja Førjulsturneringa, mat leat spábbačiekčamat rávesolbmuide. Dál lea mánáid ja nuoraid vuorru čiekčat spáppa njuolggosáddagis.

Ávvira doaibmaossodaga jođiheaddji Per Christian Biti muitala ahte Ávviris lea streamen áŋgiruššansuorgin, ja nu lea ge lunddolaš streamet go fal dan lea vejolaš. 

– Mii oaidnit ahte streamen lea hui bivnnut ja ahte mii oažžut eambbo dolliid dan geažil, nu ahte de lea áibbas čielggas ahte mii leat deaivan streamet rievttes doaluid, nu go Ávvir Cupa ja Førjulsturneringa. Nu lea ge mis dál hállu geahččalit streamet ahkemearriduvvon spábbačiekčama maid, ja sávvat ahte olbmuin lea dasa ge seamma stuora beroštupmi go ovddit sáddagiidda, dadjá Biti. 

GEARGGUS: Ávvira streamenjoavku lea fas gearggus sáddet njuolggosáddaga spábbačiekčamiin Kárášjogas. Vuorkágovva: Inga Marie Guttorm
GEARGGUS: Ávvira streamenjoavku lea fas gearggus sáddet njuolggosáddaga spábbačiekčamiin Kárášjogas. Vuorkágovva: Inga Marie Guttorm

Juoga ođas fas

Erohus man geahččit oidne Ávvir Cupas Førjulsturneringii lei ahte čiekčamat filbmejuvvojedje guvttiin kámerain, ja ahte govva molsojuvvui muhtumin. Dat ii galgga dán vuoru dahkkot. Ávviris lea ulbmil sáddet buot čiekčamiid Solturneringas, ja de šaddá hástalussan go čiekčamat mannet oktanaga guovtti láhttis. 

– Juo, mis lea mihttu čájehit juohke čiekčama mii lágiduvvo. Mii geahččalit, muhto ii leat vel áibbas sihkar ahte dat doaibmá. Lávvordaga go čikčet guovtti láhttis, de lea kommentáhtor stuorit šiljus gos boarrásat mánát čikčet, muitala doaibmaossodaga jođiheaddji ja muitala streamenbargiid oahppan ollu dan guovtti stuora streamenbarggus mat leat leamaš dán rádjái.

– Teknihkalaš osiid, nu go movt jođiha kámera ja vuohki mo sádde. Galle kommentáhtora adnojit ja maid kommentáhtorat hupmet leat oasit das maid mii leat oahppan ja váldit mielde viidásit, loahpaha son.

Roy Arthur Olsen

- Advertisement -
-Almmuhus-