-Almmuhus-
-Almmuhus-
-Almmuhus-
KULTUVRAČájehit movt eanan geava­huvvo ja mii lea váikku­hus

Čájehit movt eanan geava­huvvo ja mii lea váikku­hus

-

-

Čájáhus «Erotics of Counter-Prospecting» leaba ráhkadan dáiddárduo New Mineral Collective, ja čájáhus rahppo bearjadaga skábmamánu 15. beaivvi Dáiddaguovddážis Kárášjogas.

Dán jagáš maŋimuš čájáhus Sámi Dáiddaguovddážis lea ovttasbargu Romssa Dáiddasiiddain.  Dáiddárguovttos Tanya Busse ja Emilija Škarnulytė álggaheigga ovttasbarggu New Mineral Collective (NMC), dan áigge go soai studeriiga Romssa Dáiddaakademiijas. NMC, man soai čilgeba lea dego vuođđun iežaska guorahallamis, das mo olmmoš láhtte eatnamiin ja makkár váikkuhusaid dat láhttemat dagahit.

Viiddideame dimenšuvnna

NMC ovddit buvttadeamis guovdilaste Eurohpá davimus guovlluid, ja dál leat maiddái muhtin guovllut Davvi-Amerihkás ja Gaska-Nuorti guovlluin galleduvvon, guorahallama ja ođđa prošeaktabuvttadeami olis. Dáiddárnissonguovttos leaba prošeavtta dimenšuvnna viiddideamen, sihke geográfalaččat ja maiddái politihkalaččat.

Duhtavaš ovttasbargguin

– Mii leat hui duhtavaččat go leat ožžon ovttasbargošiehtadusa Romssa Dáiddasiiddain. 2019:s čájeha SDG ovtta čájálmasa Romssas. Čájálmas «Making form», mii lea čájehuvvon Kárášjogas 2018 geasi, čájehuvvo čakčat Romssas. Kárášjogas beassat geahččat čájáhusa mii lei festiválačájáhus Romssa internationála dáiddafestiválas. SDG:i lea hui dehálaš ahte lea ovttasbargu eará njunuš aktevrraiguin Davvi-Norgga dálááiggedáidagis, dadjá SDG direktevra Kristoffer Dolmen.

Joatkka 

Čájáhus «Erotics of Counter-Prospecting» oahpista gehččiid dáiddabargguide dahkkojuvvon áigodagas 2013 rájes, gitta 2019 rádjái, filmma ja čuovgaboksagovva hámis, installašuvdna-, aviisa- ja teakstahámis.

Čájáhus lea joatkka dán jagáš festiválačájáhusas mii čájehuvvui Romssa internationála Filbmafestivála doaluid áigge, ja lea oaidninláhkai Kárášjogas.

Čájáhus rahppo bearjadaga skábmamánu 15. beaivvi diibmu 18.00. Čájáhusa sáhttá oaidnit gitta ođđajagemánu 5. beaivvi rádjái.

-Almmuhus-