Ávvir sádde njuolggosáddaga vuodjangilvvus Arctic Winter Swim maid Kárášjoga vuodjansearvi lágida dán vahkkoloahpa.
Guovvamánu 29. beaivvi ja njukčamánu 1. beaivvi lágiduvvojit Arctic Winter Swim (AWS) gilvvohallamat Kárášjogas. Dán jagi lea earenomáš jahki, go AWS:s lea 50-jagi ávvudeapmi ja lea maiddai vuosttaš geardde go biirečoagganeapmi streamejuvvo.
Kárášjoga vuodjansearvvi jođiheaddji, Nina Charlotte Olsen, lohká lea hirbmat somá go Ávvir sádde njuolggosáddaga vuodjama biirečoagganeamis.
– Min mielas lea hirbmat somá go Ávvir galgá sáddet njuolggosáddaga. Lea vuosttáš geardde go Arctic Winter Swim streamejuvvo, ja lea hui buorre go mii nagodit čađahit dan, dadjá Olsen.
– Miella geahččalit sáddet juoga ođđasa
Ávvir lea maŋemus mánuid sádden njuolggosáttan sihke Ávvir Cupa, Førjulsturneringa ja Solturneringa, mat leat spábbačiekčamat.
Ávvira doaibmaossodaga jođiheaddji Per Christian Biti muitala dá lea vuosttaš háve go Ávvir sádde njuolggosaddaga vuodjangilvvus.
– Lea vuosttaš háve go mii streamet vuodjangilvvu. Mis lea miella geahččalit sáddet juoga ođđasa iige beare daid árbevirolaš streamaid dego spábbačiekčamiid ja konsearttaid. Dat han lea stuorra biirečoagganeapmi gosa servet olu nuorat ja olu buorit doalut, dadjá Biti.
Hástalus čáziin ja áimmu láktasiin
Biti muitala sii leat bures ráhkkanan njuolggosáddagii go diehtá sáhttá šaddat hástalus čáziin ja áibmoláktasiin.
– Dat šaddet dieđusge hástalusat go lea alla lávttas áimmus, ja dan ládje sáhttá maid šaddat lávttas kámeralinsa. Mii eat leat dán dahkan ovdal, muhto leat bures ráhkkanan njuolggosáddagii. Altapostena bargi Even Martinsen boahtá vel min veahkehit. Mis leat gaskal golbma ja vihtta kámera mainna mii filbmet vuodjangilvvu, dan ládje ožžot geahččit oaidnit olles gilvvu mii dáhpáhuvvá vuojadanáldásis, dadjá Biti.
