Stian Johansen ja John Ole Ellila Sara gárttaiga nuppi ja goalmmát sadjái Davvi-Norgga meašttirgilvvuin huksenfágas.
Stian Johansen bargá Harald Nilsen AS fitnodagas ja John Ole Ellila Sara JARO:s. Johansen lea Finnmárkku fylkkameašttir betoŋgafágas ja Ellila fas huksenfágas, ja leaba vahkkoloahpas gilvalan Davvi-Norgga meašttirgilvvus.
Eai beassan guođđit sajiid
Praktihkalaš oassi oahpahalliid gaskkas finálas čađahuvvui hirbmat čáppa beaivvádagas Mandelaguolbanis Romssas, go Davvi Norgga huksen- ja rusttetmeassut lágiduvvojedje bearjadaga. Nordlándda, Romssa ja Finnmárkku oahpahallit bargagohte gilvvuin diimmu ovdal go MEF ja NESO direktevrrat Julie Brodtkorb ja Ruben Jensen rabaiga meassuid.
Praktihkalaš oasis finálas barge oahpahallit sirrejuvvon sajis dahje tealttás. Sii eai sáhte guođđit saji, ja jus guđđet saji, de lohkko bargu loahpahuvvon ja gárvvisin. Oažžu eanemusat geavahit njeallje diimmu čoavdit barggu gilvvohallamis.
Čiegus galle čuoggá ožžo
Bearjadaga diibmu 15 ožžo finalisttat ieža maid oaidnit nubbi nuppi bargguid, muhto lei čiegus galle čuoggá ledje ožžon ovdal go álggahedje teorehtalaš oasi gilvvus lávvordaga ovdalgaskabeaivvi.
Maiddái geahččit ledje čuovvume gilvvu, de besse gilvaleaddjit vuos gullat galle čuoggá ledje ožžon praktihkalaš oasis.
Logi čuoggá sáhtii eanemusat fasket, ja vuosttaš oasis betoŋgafágas oaččui Vinjar Sæther Consto Nord fitnodagas logi čuoggá, Ole-Jørgen Jansen Breen MBA Entreprenør fitnodagas gávcci čuoggá, ja John Ole Ellila Sara fas guhtta čuoggá.
Snihkkenfágas gárte ovcci čuoggá Joakim Johansenii Hadsel Bygg og Vedlikehold fitnodagas, guhtta čuoggá Stian Johansenii gii bargá Harald Nilsen AS:s, ja vihtta čuoggá Casper Johansenii TotalRenovering fitnodagas.
Historjjálaš vuoiti
Vinjar Sæther ja Joakim Johansen leigga njunnošis goappáge fágasuorggis praktihkalaš oasis. Sæther oaččui logi čuoggá, mii lea dat eanemus maid sáhttá oažžut, ja Johansenis gessui okta čuokkis fágaduopmáris praktihkalaš oasis.
– Sæther šattai historjjálažžan go šattai Davvi-Norgga meašttirin 20 čuoggáin, mii lea eanemus maid sáhttá olahit. Johansen vástidii boastut ovtta gažaldaga teorehtalaš jearahallamis, čállá lágideaddji preassadieđáhusas maŋŋel gilvvu.
– Čájehii buori bargomorála
– Ferte ráhkkanit bures ja leat ráhkkanan ahte sáhttá šaddat váttis gilvun. Lea issoras gelddolaš ja garra gilvu. Ferte bargat bures praktihkalaš oasis ja teorehtalaš oasis, logai Ellila Sara Ávvirii moadde vahkku ovdal gilvvuid.
Betoŋgafága gilvaleaddji John Ole Ellila Sara beasai duopmáris gullat beliid maid lei bargan bures ja mii ii mannan nu bures.
Fágaduopmáriid čoahkkáigeassu Finnmárkku gilvaleddjiid praktihkalaš barggu ovddas lei sihke rápmi ja vehá cuiggodeapmi.
– Vajáldahtii bidjat dan oasi mii doallá gitta, muhto sáhtii čilget fágaduopmárii lássenprinsihpaid. Son ii lássen dan oasi mii doalaha betoŋgga sajis dan botta go garrá, ja oaččui gessot čuoggá dan ovddas. Mihtideapmi ja čiegat ledje hui buorit ja millimehtera mielde áibbas juste. Sara ipmirda bures barggu prinsihpaid mii guoská oassái go bidjá betoŋgga, čálii fágaduopmár ja deattuhii maid finalistta buori bargomorála.
John Ole Ellila Sara viežžalii 13 čuoggá, ja lei čieža čuoggá unnit go vuoitis.
Betoŋgafágaduopmár lei Are Henning Olsen.
– Nagodii bures njulget barggu
Huksenfága gilvaleaddji Stian Johansen oaččui gullat fágaduopmára duomu.
– Logai bargobihtá veahá hejot ovdal go bargagođii, ja dat dagahii ahte álgu ii mannan áibbas bures. Son nagodii njulget barggu, mii lei hui buorre. Sus lei boasttu čoavddus čiegain, muhto muđui ledje njulges čiegat. Sus ledje riekta modulajuogut tevnnega mielde, čálii fágaduopmár su čilgehusas.
Stian Johansen oaččui oktiibuot 11 čuoggá, ja lei čieža čuoggá unnit go vuoitis.
Huksenfágaduopmár lei Ronny Fyhn.
Goappašat fágaduopmárat bargaba Peab Bjørn Byggas.
