Vaikko vuogga lea darvánan bodnái, de it soaitte dárbbašit massit vuokka, muitala guollebivdi gii viššalit oaggu jogain.
Vaikko vuogga lea darvánan bodnái, de it soaitte dárbbašit massit vuokka, muitala guollebivdi gii viššalit oaggu jogain.
Sáhttá billistit movtta go massá vuokka mii lea bodnái darvánan. Don gaikut juohke ládje dassážii go gárdni boatkana. Vearrámus lea jus stávrá vel doddjo. Muhto gávdno okta vejolašvuohta maid sáhtát geahččalit jus oakkut jogas.
Muitala goanstta birra
– Sáhtát ávkkástallat golgi čáziin, muitala Statskog konsuleanta ja meahcásteaddji Geir Wagnild.
Son doajista moadde rissebihtá ja ráhkada rieggá. Oaggunstákku coggala dan rieggá čađa ja diktá mannat gártni čáhcái. Johka doalvu gártni dobbelii ja geassá gártni nuppi guvlui.
– Vuokka deaddu rievdá, ja sáhttá luovvanit. Ii álo doaimma, muhto lea veara geahččalit. Mun dagan dan dávjá, muitala Wagnild.
Ferte čáhci mii lihkada
Jus oakkut jávrris gos čáhci ii golgga seamma ládje, de ii leat sihkar ahte dat doaibmá seamma bures oažžut vuokka luovvanit, go dat ferte čáhci mii lihkada.
– Geahččal rievdadit čuožžunsaji gáttis, ja gaikko gártni dain ođđa báikkiin gos don leat. Jus leat fatnasis, de sáhtát suhkat nuppe geahčái ja doppe geahččalit luvvet vuokka, muitala Statskog seniorkonsuleanta Torkel Skoglund.
Jus ii doaimma nu, de soaittát šaddat gaikut vuokka nu garrasit go duosttat nu ahte ii gárdni ii boatkan. Luoitte gártni fáhkkestaga nu ahte vuogga njuike ruovttoluotta. Dainnalágiin sáhttá maid vuogga luovvanit.
– Buot maŋemus vuohki lea gaikut gártni gitta vuogga luovvana dahje gaikut nu garrasit ahte gárdni boatkana. Muitte fal ahte it goassege giesa gártni gieđa birra, go de sáhttá gárdni čuohppat liikki. Giesa baicce gártni soaji birra dahje muhtin rissi birra maid de gaikkut, muitala Skoglund.
Geavat gehppes vuokkaid
Jus lea coagis, de bija áinnas vuokka mii govdu, dahje gehppes vuokkaid mat eai vuojo nu álkit ja darván. Veive vuokka jođáneappot coahkásis.
Torkel Skoglund láve ollu oaggut ja lea vásihan ahte vuokkat eai bistte agibeaivve.
– Vuokka massit dáhpáhuvvá dávjá. Geasis šattan fitnat máŋga tuvrra rámbuvrras oastime eanet vuokkaid. Jogaide sáhttet báhcit eanet go logi vuokka mu maŋis ovtta geasis, muitala Skoglund.
Geahča filmma dás movt Wagnild oažžu luovos vuokka jogas.
