Dál lea goalmmát jahki go Riddu Riđđu ovttasbargá Tromssa Internašunála Filbmafestiválain. Dán jagi čájehit nuorra dáiddára Elina Waage Mikalsena TIFF-gehččiide.
Dál lea goalmmát jahki go Riddu Riđđu ovttasbargá Tromssa Internašunála Filbmafestiválain. Dán jagi čájehit nuorra dáiddára Elina Waage Mikalsena TIFF-gehččiide.
Mikalsen nammaduvvui «Dán jagáš nuorra dáiddárin» Riddu Riđus 2015:s. Son lea nuorra multidáiddár Tromssas eret, ja sus leat sihke rivgo- ja sámemáttut.
TIFF 2016:s čájeha Mikalsen dan mii lei su váldodáidda Riddu Riđus. Dat lea videoinnstalašuvdna mii hástala sosiála eahpesihkkarvuođa ja identitehta.
Dasa lassin gullet čájáhussii govvaráidu mas leat teavsttat ja guokte videodáidaga, čállá Riddu Riđđu preassadieđáhusastis.
Loga maid: Jagi nuorra dáiddár nammaduvvon
– Stuorra vejolašvuohta
Elina illuda hohppos beivviide filbmafestiválas, gos beassá čájehit dan maid eanemusat liiko bargat.
– Dát dáidá leat stuorámus maid goassege lean dahkan, ja lea máilmme somá go dat lea TIFF oktavuođas. Lea duođaid inspirerejeaddji, lohká ieš.
Riddu Riđu festiválahoavda Karoline Trollvik dadjá:
– Elina dáidda lea sihke hástaleaddji ja dakkár mii bidjá jurdagiid johtui. Mun lean nu ilus go mii, fárrolaga TIFF:in, oažžut su taleantta čájehit olu gehččiide. Dát lea stuorra vejolašvuohta Elinai man bokte sáhttá viiddidit iežas fierpmádaga ja viežžat inspirašuvnna viidáseappot bargat dáidagiin proffa dásis.
Lávlu maid
Filbmafestivála áiggis sáhtát vásihit eambbo Elina taleanttain. Mikalsen nammalassii maiddái lávlu Blood Forest Family joavkkus.
Joavku lea čuojahan badjelaš guokte jagi, ja NRK P3 radiokanála lea čuojahan sin lávlagiid ja ávžžuhan guldaleddjiid guldalit sin musihka. Joavku lea dál ráhkkaneamen almmuhit ođđa musihka 2016:s.
Oassin Riddu@TIFF prográmmas, čuojaha joavku Driv olgobáikkis, duorastaga ođđajagimánu 21. beaivvi, diibmu 20.00.
