Dál sáhtat fas čohkkestit olbmáid ja oahppasiid ja ceggestit joavkku dán jagáš juovlačiekčamiidda, Fleskecuppenii.
Dál leat eatnasat bures ávvudišgoahtan juovllaid, iešguđetládje. Soaitá áigi fas veahá lihkadišgoahtit maŋŋel go, doaivumis, olu juovlaherskkuid lea duobadan. Guovdageainnu a-joavku lágida ihttin jahkásaš juovlačiekčama, “Fleskecup”, Báktehárjjis, ja bovdejit buohkaid cegget joavkku dan oktavuođas.
Muhtun eavttut
A-joavku leat bidjan moadde eavttu sidjiide geat áigot cegget joavkku. Eavttut leat ahte galgá okta “oldboy” (rávis dievdu badjel 33 jagi) ja okta nieida/nissonolmmoš šiljus čađat. Dasa lassin ii beasa joavkkus eara okta aktiiva čiekči šiljus ain hávalis. Muđui leat buohkat buot agin (badjel 15 jagi) bures boahtimat searvat.
Ain áigi dieđihit
Dán rádjai leat 10 joavkku dieđihuvvon, ja lea ain sadji vel logi jovkkui. Čáhkkehit oktiibuot 20 joavkku čiekčamiidda.
Dieđihanáigemearri lea odne diibmu golmmas, nu ahte lea ain áigi dieđihit iežas joavkku. Čiekčamat álget ihttin, 2. juovlabeaivvi, iđđesárrat, ja bistet beaivvi.
