-Almmuhus-
OĐĐASATČáhcevahát kulturviesus

Čáhcevahát kulturviesus

-

-

Dán vahkku lea leamaš čáhcevahát kulturviesus, go čáhci lea golgan dáhki čađa.

GUOVDAGEAIDNU: Teknihkkalašovttadaga jođiheaddji Sindre Murud, gii maiddái lea ráđđeolbmá sadjásaš dál, muitala ahte kulturviesus lea váilevaš áimmahuššan.

 – Mii leat divvon dál dan vuolit oasi kulturviesudáhkis, ja leat maiddái plánen lonuhit dáhki dakko gokko ii leat vuos divvojuvvon. Ii leat gal vel čielggaduvvon goas dát dahkko, muitala Murud.

 

Murud muitala ahte vearrámus oasit dáhkis leat divvojuvvon, muhto ii leat leamaš munni divvut buot oktanis.

 – Lea diehttelas ahte livčče leamaš ovdamunit jos olles dáhkki livčče divvojuvvon oktanis, muhto suohkana ekonomiija ferte vuos árvvoštallojuvvot. Dat lea suohkanstivra mii juolluda ruđaid dán bargui. Lea namuhanveara ahte 2017:s lea badjelaš 3 miljovnna juolluduvvon dáhki ja ventilašuvnna divodeapmái, muitala Murud.

 

Dáhkki ii leat divvojuvvon dan rájes go visti lea huksejuvvon, ja dál lea dasa dárbu.

 – In sáhte gal oktageardánit dadjat manne dáhkki golgá, muhto dáhkki ii leat divttis ja dainna mii fertet bargat juoidá. Mii váldit maiddái vuhtii bargiid bargodili buoremus lági mielde, dadjá Murud.

Murud muitala ahte čáhci ii leat golgan seamma sajes go ovddit háve.

– Dál golgá čáhci eará sajes. Dan ođđa dáhkis, mii biddjui ovddit čáhcevahága maŋŋel, galggašii leat buorre kvaliteahta, dadjá Murud.

-Almmuhus-