Koronadávdda geažil leat olu visttit čužžon guorosin, ja dal váruha Álbmotdearvvašvuođainstituhtta (FHI) ahte lea stuora várra ahte legionella bakteriija leavvagoahtá.
Vistit, nugo vuojadanhállat, hoteallat, hárjehallanbáikkit ja ealáhusvisttit, leat čužžon guorosin guhkit áiggi, ja de sáhttá legionella bakteriija leat vistti čáhcerevrriin, váruha Álbmotdearvvašvuođainstituhtta.
– Dal lea dehálaš muittuhit ahte makkár doaibmabijut gávdnojit eastadan dihte legionella bakteriija vistti čáhcerevresystemain dan áigodagas go visttit leat leamaš gitta, ja makkár doaibmabijuid ferte bidjat ovdal go rahpet fas visttiid, dan čállá Álbmotdearvvašvuođainstituhtta preassadieđáhusas.
Legionella bakteriija šaddá go čáhci orru jaska, ovdamearka dihte rišus mii ii adno guhkit áigái. Bakteriija njoammu go vuoigŋá smávva goaikkanasaid mat ávdnet rišus sisa.
Leginella bakteriija sáhttá dagahit geahpesdávdda.
– Dakkár dilis lea juo stuora deaddu ja ovddasvástádus dearvvašvuođafitnodagain, ja de leat álkis doaibmabijut mat sáhttet leat dehalaččan eastadit ahte olbmot dárbbašivčče divššu eará dávddaid dihte go covid-19, čállá Álbmotdearvvašvuođainstituhtta, ja ávžžuhit jeavddalaččat luoitit čahcii revrriin vai čáhci ii oro jaska beare guhká go visttit leat gitta.
(©NTB)
