– Mii fertet luohttit ahte buohkain geaidda addo vuodjinkoarta lea gelbbolašvuohta mii adno vai johtá dorvvolaččat johtolagas, dadjá johtolatministtar Jon Georg Dale.
– Ii galgga gánnáhit verrošit ja danin háliidit bidjat cagganáiggi jus verroša vuodjingeahččaleamis. Dat buorida johtolatsihkarvuođa ja eastada maid olbmuid verrošeamis, dadjá Dale.
Geaidnodirektoráhtta sádde gulaskuddamii dál dán evttohusa. Duogáš áššái lea go Stáhta geaidnodoaimmahat maŋimuš jagiid lea fuomášan olusiid geat leat verrošan vuodjingeahččaleamis, muhto sidjiide ii biddjon makkárge cagganáigi.
Unnit duođalaš verrošeamis, nugo geavahit notáhtaid, kámera dahje telefovnna, evttohit golmma gitta ovcci mánnosaš cagganáiggi. Duođalit verrošeapmái evttohit logi gitta jahkái cagganáiggi. Njuolggadusat gusket sihke teorehtalaš ja praktihkalaš geahččaleapmái, čállá NTB.
