Isac Elliot konsearta loahpaha Sámás Muinna giellakampánja, dasa gal giellaambassadevra liiko.
Sámás munnje kampánja ambassadevra Silje Somby lohká Isac Elliot lea dego Skandinavia Justin Bieber.
– Isac Elliot lea hui beakkán dán guovllus. Mun láven guldalit su musihka ja mu mielas lea hui čaffat go su leat deike ožžon, go dat orui áibbas veadjemeahttun bargu, dadjá son. Sii loahpahit sámás munnje kampánja dainna konsearttain.
Nuoraid artista
Sámi musihkka feastivála (SMF) ja Sámediggi almmuhii preassadeaivvadeamis gaskavahkku ahte nuoraid konsertii beassážiid, boahtá Isac Elliot.
SMF buvttadeaddji Nils Johan Vars lohká Sámás munnje kampánja, mii loahpahuvvo dalle, lea nuoraide, ja go sin galgá čohkket de lea dehálaš oažžot nuorra beakkán artista čuojahit.
– Isac Elliot lea nuoraid artista ja vuorddán 1300 olbmo konsertii,maid Báktehárji geassá. Vars lohká sii áigot hui ládje ráhkkanit, ja šaddet áibbas eará láhkai go leat nuorat,eaige rávis gárrenolbmot.
– Mii leat gullan Isac Elliota konsearttain sáhttet váibat nu ahte šaddá loktet eret konsearttas. Go almmuheamis álge čierrut, de oaidnit movt sáhttá šaddat konsearttas. Sámás munnje kampánja lágida gilvvu mas vuorbáda nuvttá bileahtaid konsertii, ja SMF áigu geahččalit ahte muhtin nuorat galget beassat deaivat Isac Elliot, muhto ii leat vel čielggas movt šaddá, muitala Vars.
Govven: Ovlla Gaup
Mávssolaš nuoraide
SMF jođiheaddji Ellen J. Sara Eira muitala sidjiide lea hui mávssolaš nuoraide addit juoidá erenoamáža.
– Vaikko Isac Elliot ii leat ge sámi artista, de addá movtta sámi nuoraide, go sii leat geat galget boahtte áiggis fievrridit viidáseappot earret eará sámi musihkkii.
Guovttegielat olmmoš
Dan ahte Isac Elliot, gii ii leat sámegielat ovddasta Sámás munnje kampánja čilge Sámedikki presideantta:
– Isac Elliot lea ieš guovttegielat olmmoš,ja dovdá daid hástalusaid, nu ahte lea giellaprofiila das. Seammás lea su bokte vejolaš čájehit ahte guovttegielatvuohta ii leat sámi fenomena, go dat lea dábáleamos dilli máilmmis ahte olbmot leat máŋggagielagat, lohká Keskitalo. Presideantta lohká gal go Elliot lea nu beakkán násti, giellakampánja sáhttá veaháš jávkat.
– Báktehárji ii leat nu issoras viiddis, nu ahte lea ráddjejuvvon man stuoris konsearta sáhttá šaddat. Sávvamis dagaha dat ahte mii nagodit čalmmustahttit Sámás munnje kampánja maiddái, lohká Sámedikki presideantta Aili Keskitalo.
