Sámedikki dievasčoahkkima jođihangoddi lea mearridan ahte lávdegoddečoahkkimat ja geassemánu dievasčoahkkin čađahuvvojit digitála reaidduiguin.
– Mii čuovvut eiseválddiid dearvvašvuođaneavvagiid. Lávdegodde- ja dievasčoahkkimiid plánemiidda lea olu mii galgá dahkkot ja danne fertet dál juo mearridit ahte čoahkkimat čađahuvvojit digitála vugiin, dadjá dievasčoahkkima jođiheaddji Tom Sottinen (Bargiidbellodat) preassadieđáhusas.
Sámediggi lea dál gávnnaheame čovdosiid movt sátnevuorut ja jienasteamit galget čađahuvvot.
– Midjiide lea hui dehálaš ahte álbmot beassá čuovvut dievasčoahkkima. Danne áigut rávdnjet (streamet) čoahkkima mii fállo buohkaide, dadjá Sottinen.
Joavkočoahkkimat, lávdegoddečoahkkimat ja dievasčoahkkin dollojuvvojit vahkku 24, mánnodagas geassemánu 8. beaivvi rájes duorastahkii geassemánu 11. beaivvi rádjai.
