Finnmárkku politiijat čađahedje promilladárkkisteami Unjárgga gielddas mannan eahkeda ja ija.
Finnmárkku politiijat dieđihit Twittera bokte ahte leat čađahan dárkkisteami iskan dihte leat go olbmot vuodjimin juhkanvuođas. Eddemannak festivála lágiduvvo dán vahkkoloahpa Vuonnabađas ja lávvardaga beaivet lágiduvvojit ges Vuonnamárkanat.
Politiijat čađahedje promilladárkkisteami Vuonnabađas mannan ija, ja dárkkistedje 26 vuoddji, ii oktage dain ožžon makkárge reakšuvnna politiijain.
Árabut eahkedis de čađahedje politiijat vuosttaš promilladárkkisteami gielddas, dat ges čađahuvvui Unjárggas. Politiijat dárkkistedje 22 biilavuoddji ja ii oktage ožžon makkárge reakšuvnna politiijain.
