-Almmuhus-
OĐĐASATBuvttii buori doaivaga

Buvttii buori doaivaga

-

-

Dálusápmelaš lea čađat leamaš vuostá álbmotmeahcci ásaheapmái Goahteluobbalis, muhto deaivvadeapmi Dálkkádat- ja birasministariinine Sundtoftain atti sutnje buori dovddu.

*/

Dálkkádat- ja birasministtar Tine Sundtoft lea dán vahkkus finadan ja deaivvadan olbmuiguin Guovdageainnus ja Kárášjogas ságástallame álbmotmehciid viiddideapmi birra. Guovdageainnus leage Birasgáhttendepartemeantta 2007 rájes plánen viiddidit ja ásahit ođđa álbmotmehciid, earret eará Goahteluobbalii.

 

Geavaheami vuođul suddjet

Ovddeš Sámi bivdo- ja meahcástansearvvi jođiheaddji Johan Henrik Buljo lei bovdejuvvon deaivvadit Dálkkádat- ja birasministariin, ja son leage čađat leamaš vuostá álbmotmeahcceplánaide Goahteluobbalis. Buljos lea bargan eará ministariiguin ja maŋŋel go deaivvadii Sundtoftain, de lei sus buorre dovdu.

 – Sundtoft logai lea doaivva gáhttet ja ráfáiduhttet guovllu geavaheami vuođul, nu gohčoduvvon suodjaluvvon guovlun dáhkkot. Dat mearkkaša olbmot besset geavahit guovllu nu movt álo leat dáhkkán, muhto lea suddjejuvvon sisabahkkemiid ektui, lohká Buljo.

Buljo lei dalle 2007 mielde lávdegottis mii barggai goahteluobbala álbmotmeahcci plánaiguin, ja lea leamaš vuostá álbmotmeahcci álggaheapmái, go dat gidde buot dálu sámiid geavaheami guovllus.

Dat ášši lea jođus leamaš guhka, ja ministtar logaige dál ovdal juovllaid dáhkko mearrádus.

 

Einnosta heaittihuvvot

Guovdageainnu sátnejođiheaddji Klemet Erland Hætta ipmirdii maid ministara nu ahte sáhttá gáhttet guovllu geavaheami vuođul, ja lihkka dohkkehit árbevirolaš geavaheami.

 – Ministtar logai dat šaddá váttisin muhto lea vejolaš. Leago sis dáhttu dan dáhkkát dan in šat dieđe, lohká son.

Hætta baicca einnosta ahte Sundtoft boahtá heaittihit buot suodjalanplánaid.

 – Ožžon dakkár ipmárdusa ahte ministtar lei ozus eambbo dieđuid báikkálaš olbmuin suodjaleami birra, ja son muitalii son lea dušše deaivan vuosttildeddjiid. Norga lea našunála lohkán sii áigot suddjet vissis meari riikas, ja gaskariikkalaččat ges lea lohkán ahte áigot álgoálbmogiid árbevierut galget jotkojuvvot. Dat lohká juo iešalddis dat šaddá váttisin ollašuvvot. Mun jáhkán su galledeapmi dáppe lei oaidnin dihte vuostehágu, ja nu oažžut ákka heaittihit olles suodjalanplánaid Finnmárkkus, lohká son.

 

Lágat fertejit rievdat

Gáldu Álgoálbmotvuoigatvuođaid gelbbolašvuođaguovddáš jođiheaddji Laila Susanne Vars lohká go ministtar ja ráđđehus áigot suddjet guovlluid, de lea buorre geahčestit maid álbmogii gii orru doppe iige dušše eatnamiidda.

Muhto ráfáiduhttit ja liikká dohkkehit árbevirolaš geavaheami šaddá oba váttis. Vuosttáš ceahkki mii boahtá lea mohtorjohtolat láhka. Ráfáiduhtten guovllus ii leat lohpi mohtorfievrruin vánddardit,ja álbmoga cakkadeapmi Guovdageainnus ja Kárášjogas ráfáiduhttimii leage leamaš danne go dat gielda mohtorjohtolaga ráfáiduhttinguovllus, lohká son.

 

Báikkálaččat hálddašit

Vars lohká 2010 rievddai láhka nu ahte suodjaluvvon guovlluid galget báikkálaččat hálddašit:

 – Jus galgá doaibmat nu movt Sundtoft árvala, de fertejit njuolggádusat ráhkaduvvot mat addet válddi suohkaniidda, muđui ii leat ávki. Jus galgá álgoálbmogiid árbevieruid sihkarasttet de ferte báikkálaš hálddašanorgána oažžut válddii, ja eará lágat fertejit ložžejuvvot dan ektui, lohká Vars.

 

 

-Almmuhus-