Dán jagi geavahedje olbmot 1,8 proseantta unnit ruđa buvddain go diibmá.
Mannan vahkkus lei Black week dahje Čáhppes vahkku. Dá lea jahkásaš gávppašanáigodat goas olbmuin lea vejolaš oastit hálbbiduvvon gálvvuid. Dat álggahuvvui Black friday nammasaš gávppašanbeaivin USA:s ja galgá leat álgun juovlagávppašeapmái. Norggas čuovvuledje dan vieru 2010:s ja dan rájes lea gávppašanáigodat guhkiduvvon ovtta beaivvis olles vahkkui.
Oallugat gávppašit Black week oktavuođas, muhto dán jagi gal njiejai gávppašeapmi buvddain. Go buohtastahttá diimmá loguiguin, de njiejai gávppašeapmi 1,4 proseanttain ja ruhtageavaheapmi ges njiejai 1,8 proseanttain.
Vaikke gávppašeapmi njiejai, de oaivvilda Bankaxept máksinbálvalusa jođiheaddji Kjetil Bøe ahte buvddaid johtu doallá alla dási.
– Buvddain eai dáidde olahan ođđa dienasolahusa go buktagat ledje hálbbibut go diibmá ja go oallugat gávppašit neahta bokte, lohká Bøe preassadieđáhusas.
Heajos beaggin
Black week dahje Čáhppes vahkku oaččui heajos ovdagihtii máinnašumi dán jagi.
– Norgalaččat eahpidit Black week haddefálaldagaid. Olbmot dáidet luohttit Black week haddefálaldagaide buorebut jus buvddain leat reála haddefálaldagat main lea ávki ovddasguvlui, lohká Bøe.
Son geažuha maid ahte olbmot leat pandemiija-áiggi geavahan olu ruđaid divodit ja ođasmahttit viesuid ja barttaid, nu ahte dat ii vuoruhuvvo šat dán jagi.
Elektronihkkagálvvuid johtu njiejai eanemusat dán jagi, olbmot geavahedje 20 proseantta unnit ruđaid ovdamearkka dihte galmmihanskábiide ja bivttasbassanmašiinnaide. Olbmot oste maiddái unnit viessogálvvuid, gávpejohtu njiejai 12 proseanttain. Valáštallan- ja astoáigebuktagat gal baicce johte buorebut, olbmot geavahedje 0,3 proseantta eanet ruđa dáid gálvvuide. (©NTB)
