Yrkestrafikkforbundet lea čađahan iskosa mii čájeha okta viđa bussevuoddjis lea vásihan badjelmeare olu olbmuid busses.
Vaikke mielčuovvulohku lea niedjan dán maŋimuš vahku, de leat bussevuoddjit vásihan badjelmeare olu olbmuid busses. Riikkadásis lea 27,8 % bussevuoddjit vásihan eanet mielčuovvuid busses go mii lea ávžžuhuvvon, Finnmárkkus lea lohku 20 %. Finnmárkku bohtosat leat heajut iskosis go lea geahččan ráinnasvuođa dahje hygiena bargodábiid go bussevuoddjit molsašuvvet.
Okta viđa (20%) bussevuoddjis Finnmárkkus lohket iskosis vásihan dilálašvuođa gos mielčuovvu lea fuonit láhtten ja maiddái rihkkun eiseválddiid koronarávvagiid busses. Riikagaskamearálaš lohku lea 16,7 %.
Alla logut
Skuvllat álggahit sin doaimma vahku mielde. Vaikke bussevuoddjit leat vuodján vihtta vahku koronadilis de eai leat bargodábit sajis máŋgga bussefitnodagas. Iskosis vástidit masá bealli (46,7%) Finnmárkku bussevuddjiin ahte sii leat okto jus čuožžilit dilálašvuođat busses nugo go leat menddo olu mielčuovvut, mielčuovvut geat eai čuovo njoammueastadeami rávvagiid dahje juoidá sullasaš. 13,3 % vástidit ahte sii eai dieđe maid galget bargat jus čuožžilit dakkár dilálašvuođat. Riikagaskamearálaš lohku lea 39 % ja 24,8 %.
Sávvet liige veahki
Yrkestrafikkforbundet nubbijođiheaddji Trude Valle oaivvilda dát logut leat menddo alladat.
– Dušše dat ahte okta gávcci bussevuoddjis ii leat ožžon doarvái dieđuid mo sii galget hálddašit váttis ođđa dilálašvuođaid pandemiija oktavuođas lea heivemeahttun. Máŋga bussefitnodaga eai oro ásahan ge liige veahki bussevuddjiide gos diekkár dilálašvuođat sáhttet geavvat, de leat mii hui heajos dilis gieđahallat dili go lassána lohku kollektiivvamátkkošteddjiin ovddosguvlui, váruha Valle preassadieđáhusas.
