Sámi servodat dárbbaša stuorát juolludemiid ja diehttevašvuođa vai oččošii seamma ovdáneami go servodat muđui, oaivvilda Sámediggeráđđi.
Sámedikki dievasčoahkkin galgá golggotmánus meannudit ášši Sámedikki 2022 bušeahttadárbbu birra. Sámi servodat dárbbaša stuorát juolludemiid ja diehttevašvuođa vai oččošii seamma ovdáneami go servodagas muđui, oaivvilda Sámediggeráđđi.
Sámedikki mihttomearri lea ahte sámi álbmot, sámi ásahusat ja sámi ealáhusat galget beassat searvat seamma ovdánahttimii go dáža servodagas lea. Ovddeš stáhtabušeahtain lea leamaš unnán ovdáneapmi danne go juolludeapmi ii álo govčča haddegoargŋuma. Dat buktá sámi servodahkii stuorra bušeahttadárbbuid.
– Jagiid mielde lea bálká- ja haddelasáhus oktiibuot ollu bázahallan, ja nu lea maid stáhtabušeahta lassáneamis ollásit. Stuorra našuvnnalaš áŋgiruššamiin sámi fálaldat ii loktejuvvo seamma láhkai, mii dagaha stuorát earu. Sámi servodat ii oaččo seamma vejolašvuođaid ovdánit ja vajálduvvo dávjá našuvnnalaš áŋgiruššamiin. Dat buktá ollu bušeahttadárbbuid ja dárbbašit ollislaš áŋgiruššama, dadjá sámediggeráđi Henrik Olsen, preassadieđáhusas.
Sámedikki bušeahttadárbbus leat guokte oasi, váikkuhusaid ektui muddejuvvon bušeahtta ja áŋgiruššanevttohus. Váikkuhusaid ektui muddejuvvon bušeahtta lea dálá doaibmadási joatkka mearrádusaid ja oahpes geatnegasvuođaid vuođul.
Sámi ulbmiliin galgá seamma lassáneapmi go stáhtabušeahtas muđui. Dat prinsihppa lea Sámedikkis leamaš ollu jagiid. Danne lea Sámediggi váikkuhusaid ektui muddejuvvon bušehttii bidjan 2020 vuolleruhtadeami.
Sámedikkis lea ovddasvástádus ollu surggiin, ja áŋgiruššanevttohusas bušeahttadárbbut ovdanbuktojit surggiid mielde. Áŋgiruššanevttohusat čájehit man stuorra servodatbargu Sámedikkis lea, ja dat guoská buot servodatsurggiide. Áŋgiruššanevttohusain konkrehta bušeahttadárbbut čilgejuvvojit.
– Bušeahttadárboášši čájeha sámi servodaga dárbbuid. Sámedikki servodatbargu lea sápmelaččaid álbmogin ja eamiálbmogin sihkkarastit ja ovdánahttit, ja nu maid giellamet, kultuvramet ja servvodagamat. Min mihttomearri lea ahte sámi servodagas galgá leat seamma vuoigatvuohta ovdánit, ja ahte Sámediggi ieš galgá beassat mearridit mo ovdáneapmi galgá, loahpaha Olsen.
