Gáivuona Guovddášbellodaga sátnejođiheaddjeevttohas Svein O. Leiros, jáhkká bellodagaid oainnu suohkanreforbmii váikkuhit dán jagi suohkanválggaid Gáivuonas.
Gáivuona Guovddášbellodaga sátnejođiheaddjeevttohas Svein O. Leiros, jáhkká bellodagaid oainnu suohkanreforbmii váikkuhit dán jagi suohkanválggaid Gáivuonas.
– Mun in jáhke Gáivuona suohkan goassege ovttastuvvá ovttage eará suohkaniin, muhto jus nu geavvá, de goit ii Guovddášbellodat goassege dohkket ahte sámevuohta jávká Gáivuonas. Gáivuona suohkan lea sámegiela hálddašanguovllus mielde, ja de fertejit eará suohkanat maid šaddat sámesuohkanin jus nu geavvá ahte Gáivuona suohkan ovttastuvvá eará suohkaniiguin, dadjá Guovddášbellodaga sátnejođiheaddjeevttohas Svein O. Leiros.
Ivguvuona suohkan
Leiros muitala ahte Gáivuona, Ivgu ja Omasvuona suohkaniin lea leamaš oktasaš suohkanstivračoahkkin gos sii digaštalle juste dan ja ahte son almmuhii juo ođđa suohkannámá sin oktasaš suohkanstivračoahkkimis.
– Skávžáádját gaikkáhalle gal veháš iežaset skávžžáid go mun lohken ođđa suohkannamma lea «Ivguvuona suohkan», ja nama mun lohken dušše sámegillii, muhto ii okta ge šiitán dan nama ja buohkat ledje ovttaoaivilis, nu go mii Gáivuona bealis gáibideimmet, ahte sámevuohta ferte leat oidnosis jus suohkanat ovttastuvvet, muitala Guovddášbellodaga sátnejođiheaddjeevttohas Svein O. Leiros.
Skuvladigaštallan nohkan
– Gáivuonas lea hui garra digaštallan leamašan maŋŋel go dálá suohkanstivra mearridit rievdadit skuvlastruktuvrra ja heaittihit Nieidaluovtta skuvlla Gáivuonas. Guovddášbellodat jienastii vuostá, muhto Risttalaš álbmotbellodat, Ovddádusbellodat ja Bargiidbellodat ožžo eanetlogu mearrádussii. Mii váiddiimet dalle mearrádusa lobálašvuođa, ja nu fertii suohkanstivra duššin dahkat mearrádusa ja bisuhit skuvlla. Skuvladigaštallan maid nogai go mii bellodagaid gaskkas šattaimet ovttaoaivilii bisuhit dálá skuvlastruktuvrra. Guovddášbellodat áigu dán struktuvrra bisuhit boahtteáiggis maid, ja vaikke digaštallan lea nohkan, de dáidet olbmot aŋkke muitit bures dálá suohkanstivrra mearrádusa mii duldehii álbmoga, dadjá Leiros.
Ruoná suohkan
Guovddášbellodaga sátnejođiheaddjeevttohas muitala ahte sis leat dušše guokte mandáhta dálá suohkanstivrras, muhto sii aŋkke leat olahan issoras olu bargat suohkana ássiid ovddas.
– Mii bidjat álot válgaprográmma bajás dainna lágiin ahte olbmot galget sáhttit mihtidit Gáivuona Guovddášbellodaga, lohpádusaid ja olahusaid vuostá. Earret eará leimmet mii lohpidan ođđa valáštallanvistti suohkanii, ja dál lea ođđa visti Dálvvesvákkis gos min nuorat besset valáštallat, rámpo Leiros. Son einnosta olbmuid muittit Guovddášbellodaga bargguid sihke skuvlaáššis ja valáštallanvistti oktavuođas ja maid sin oainnu dan ođđa suohkanreforbmii, go dán jagi nahkehit jiena jienastanboksii.
– Lea fal buorre vejolašvuohta ahte suohkana politihkalaš ivdni lea ruoná maŋŋel dán jagi válggaid, dadjá Guovddášbellodaga sátnejođiheaddjeevttohas Svein O. Leiros.
Eai áiggo sámevuođa bágget olbmuid ala
Bargiidbellodaga sátnejođiheaddjeevttohas Trond Skotvold ii áiggo gal sámevuođa ge bágget olbmuide jus suohkanat ovttastuvvet.
– Mii gal Bargiidbellodaga bealis eat hálit sámevuođa bágget olbmuide jus suohkana ássit eai hálit leat mielde sámegiela hálddašanguovllus. Jus orru dárbu, de mii čađahit geavaheaddjijearahallama mas ássit de mearridit galgá go suohkan leat sámesuohkanin. Jus eai hálit, de sáhttá geassádit eret das, muhto unnán mun jáhkán nu geavvat go Gáivuonas ii leat nu vuosteháhku šat sámegiela vuostá go álggos lávii go bidje sámegiel šilttaid, muitala Trond Skotvold.
Bargiidbellodaga sátnejođiheaddjeevttohas maid muitala ahte sii leat bellodatprográmma bokte mearridan ahte sámegiella galgá ovdánahttojuvvot mánáidgárddiin ja skuvllain.
– Ii sin gudni
Skotvold maid ii leat ovttaoaivilis dasa ahte lea Guovddášbellodat mii leat bissehan skuvladigaštallamiid.
– Na gal dat goit juollu Svein O. Leiros rámpot ahte dat lea sin gudni, muhto Bargiidbellodagas dat lea eanetlohku suohkanstivrras ja min haga ii livčče Guovddášbellodat mearridan maidege. Juo, Guovddášbellodat evttohii guorahallat lobálašvuođa suohkanstivrra mearrádusas heaittihit Nieidaluovtta skuvlla, mii mieđiheimmet, ja fylkkamánni de guorahalai ja gávnnahii ahte mearrádus ii lean lobálaš. Nu ahte die gal ii leat eará válgagižžu Guovddášbellodaga bealis, dadjá Skotvold.
(Ášši lea almmuhuvvon báberaviissas 22.08.15)
