Goalmmát kvartálas dán jagi lei 6,5 proseantta buozalmasvuođajávkan. Dat ii leat rievdan ovddit kvartála rájes, dieđiha Nav. Nissonolbmuin lea eambbo jávkan.
Goalmmát kvartálas dán jagi lei 6,5 proseantta buozalmasvuođajávkan. Dat ii leat rievdan ovddit kvartála rájes, dieđiha Nav. Nissonolbmuin lea eambbo jávkan.
Nuppi kvartálas goalmmát kvartálii lassánii doavtterduođaštuvvon jávkan 0,3 proseanttain. Seammás njiejai iešdieđihuvvon jávkan 3,9 proseanttain.
Nav dieđiha ahte doavtterduođaštuvvon jávkan lea 5,4 proseantta, ja iešdieđihuvvon jávkan lea 1,0 proseantta.
– IA-šiehtadusa mihttu lea vuolidit obbalaš buozalmasvuođajávkama 20 proseanttain, go buohtastahttá 2001 nuppi kvartálain. Dan rájes lea buozalmasvuođa jávkan njiedjan 9,9 proseanttain, ja lea leamaš sullii seamma dásis maŋemuš vihtta jagi, lohká bargo- ja čálgodirektevra Sigrun Vågeng.
Nissonolbmot dávjjit buohccit
Nissonolbmuid jávkan lea veaháš lassánan, 6,8 proseanttas 6,9 prosentii. Dievdduin lea bisson 4,2 proseanttas.
Sii guđet leat dušše oasseáiggi buohccindieđihuvvon, lea maid njiedjan. 23,1 proseanttas 21,9 prosentii. Dat guoská sihke nissonolbmuide ja dievdoolbmuide.
Stuora gávpogiin unnit jávkan
Leat stuora erohusat fylkkas fylkii, cealká Nav. Fylkkain, gos leat stuora gávpogat, lea unnán buozalmasvuođajávkan.
Stuora gávpogiin leat bargoolbmot nuorabut, ja sis lea dávjjit alit oahppu. Dáin joavkkuin lea unnit buozalmasvuođajávkan, ja lea maid hárve ahte sii dieđihuvvojit oasseáiggi buohccin.
33 proseantta oasseáiggi buohccindieđihuvvomat leat psyhkalaš váttuid dihtii, 27 proseantta leat deahkke- ja dákteváttuid dihtii.
(©NTB)
