Romssa ja Finnmárkku fylkkasuohkan lea ožžon gažaldaga váldit vuostá 2835 báhtareaddji Ukrainas.
Fylkkasuohkan čállá preassadieđáhusas ahte leat sádden reivviid buot suohkaniidda mas diehtojuohkin ja ráđđeaddin fálaldat ássan- ja integrerenbarggu dáfus.
– Ukraina-soahti hirpmástuhttá ja čuohcá midjiide buohkaide. Dál mii leat viidát mobiliseren vai nagodit váldit vuostá báhtareddjiid. Suohkanat leat vuosttašveahkkebálvalusat, ja fylkkasuohkan háliida doarjut suohkaniid dan barggus, dadjá máhtto- ja integreren fylkkaráđđi Bjarne Rohde (SG) preassadieđáhusas.
Fylkkasuohkanis lea bagadeaddji- ja láhčinrolla, seammás go lea suohkaniid gulahallanorgána IMDi, UDI, politiijaiguin ja earáiguin. Dál ávžžuha Rohde suohkaniid váldit oktavuođa jus leat gažaldagat. Ja jus bohtet vástádusat mat gusket eará suohkaniidda maid, de áigot áinnas juogadit dieđuid jus ožžot lobi.
– Doaivumis leat oalle seammalágan hástalusat mat čuožžilit suohkaniin, dadjá Rohde.
