– Mii dárbbašit eanet fidnolaš sámi mátkeealáhusoassálastiid mat fállet albma ja buriid buktagiid maid jearahit riikkaidgaskasaš mátkeealáhusmárkanis, dadjá sámediggeráđđi Silje Karine Muotka.
– Mii dárbbašit eanet fidnolaš sámi mátkeealáhusoassálastiid mat fállet albma ja buriid buktagiid maid jearahit riikkaidgaskasaš mátkeealáhusmárkanis, dadjá sámediggeráđđi Silje Karine Muotka.
Sámediggeráđđi juolluda 850 000 ruvnnu doarjjan Nordnorsk Reiseliv AS prošektii Sámi Mátkeealáhus 2.0. Prošeakta galgá loktet sámi mátkeealáhusfitnodagaid gelbbolašvuođa ja eanedit daid buktagiid ja márkanosiid.
Sámi Mátkeealáhus 2.0 lea dan Sámi Mátkeealáhus prošeavtta joatkka man Origo Nord lea jođihan áigodagas 2012-2015.
Ođđa oassi prošeavttas
– Dat mii lea ođas dán joatkimis, lea ahte sámi mátkeealáhussuorgi dás čadnojuvvo dálá mátkeealáhusbirrasii ja nu beassá ávkkástallat ásahuvvon fierpmádagain, alla mátkefágalaš gelbbolašvuođain ja nana vuovdalankanálain mii sáhttá loktet juohke fitnodaga prošeavttas, dadjá sámediggeráđđi Silje Karine Muotka.
NordNorsk Reiseliv AS (NNR) vuovdala Davvi-Norgga mátkemearrin našuvnnalaččat ja riikkaidgaskasaččat. Fitnodagas leat 15 bargi kantuvrrain Romssa, Álttá ja Bådådjo kantuvrrain.
Geasuhit sámi kultuvrrain
«Sámi kultuvra ja historjá galgá leat váldoággan dasa ahte vuolgit Davvi-Norgii luopmomátkái, ja dakko bokte ahte eanebut háliidit muosáhit Davvi-Norgga sámi kultuvrra geažil, de dat galgá šaddat vuođđun birrajagi barggolašvuhtii» čuožžu čilgejuvvon prošeavtta mihttomeari birra.
Sámi Mátkeealáhus 2.0 galgá leat rabas fierpmádat mii fállá gealbudeami buohkaide geat háliidit háhkat ođđa máhtu. Adnojuvvo deaŧalažžan ahte buot fitnodagat ja eará instánssat, main lea erenoamáš beroštupmi fágasuorggis, ožžot fálaldaga searvat rabas čoahkkanemiide nu go semináraide, kurssaide ja konferánssaide. Dakkár fitnodagat dahje ásahusat, mat eai leat mielde prošeavttas, fertejit máksit ieža dakkár lágidemiide searvama ovddas.
Eaktivuohta ja jáhkehahttivuohta
Mátkeealáhusfitnodagat Lullisámi guovlluin galget oažžut saji Sámi Mátkeealáhussii 2.0. Sámediggeráđđi Silje Karine Muotka dadjá ahte mátkeealáhusáŋgiruššamat sámi kultuvrrain fertejit leat vuođđuduvvon eaktivuhtii ja jáhkehahttivuhtii.
– Olles prošeavttas ferte leat sáhka albma ja jáhkehahtti sámi mátkeealáhusbuktagiin, dadjá Muotka.
– Sámi mátkeealáhusas lea buorre vejolašvuohta šaddat ollu stuorát ealáhussan sámi guovlluin go dál. Mii dárbbašit eanet fidnolaš sámi mátkeealáhusoassálastiid geat fállát albma ja buriid buktagiid maid jearahit riikkaidgaskasaš mátkeealáhusmárkanis, dadjá Muotka.
