Eai goassege leat nu olu luossatonnaid goddán FeFo-jogain go diibmá. Gávcci jogas dan 50 jogas ledje olahusat. Vihtta joga ledje Norgga buoremus luossajogaid searvvis.
Buot jogain maid Finnmárkkuopmodat (FeFo) hálddaša, godde oktiibuot 66 240 kilo luosa. Dain 50 jogain godde 32 826 luosa. Dat lea veahá unnit go ovddit jagi, muhto kiloid dáfus lea eambbo go goasse ovdal mihtiduvvon.
– Lea ođđa olahus FeFo-jogain, lohká meahccehálddašeaddji Steinar Normann Christensen.
Olu olahusat
Olu FeFo-jogain ledje ođđa olahusat diibmá.
– Gorbovuonjogas. Stohkkavuonjogas, Lákkojogas, Rákkojogas, Geanjas, Oarddojogas, Ánnejogas ja Suovvejogas ledje olahusat 2016:s. Dain jogain lea Ánnejohka stuorámus johka, lohká son.
Lassin leat vihtta FeFo-joga Norgga buoremus luossajogaid searvvis. Dan čájehit logut maid Statistihkalaš guovddášdoaimmahat lea buvttadan.
Dat vihtta luossajoga mat leat buoremusaid searvvis leat Ánnejohka, Leavdnjajohka, Oarddojohka, Riehpovuonjohka ja Skáiddijohka, ja Geatnja.
Buori barggu
Earret go Álttájohka, Deatnu ja Njávdán, de leat buot luossajogat Finnmárkkus FeFo hálddašeamis. Christensen lohká buorre ovdáneapmi lea rápmin joavkkuide ja servviide mat lihttoláigohit čázádagaid.
– Mis lea leamaš buorre ovdáneapmi iežamet čázádagain guhká juo, ja dat lea rápmin min lihttoláigoheddjiide, lohká Christensen.
Logut čájehit ahte leat hui olu gaskkamuttus stuora luosat mat leat goddon. Danne jáhkká Steinar Normann Christensen ahte goddet olu stuora luosaid boahtte geasi.
