Nu lohká Guovdageainnu minerálabohkanfitnodaga eaiggát dasa go Nussir ASA lea ožžon ruvkeálggahanlobi Riehpovuonas, Fálesnuoris.
Nu lohká Guovdageainnu minerálabohkanfitnodaga eaiggát dasa go Nussir ASA lea ožžon ruvkeálggahanlobi Riehpovuonas, Fálesnuoris.
Guovdageainnu bohkanfitnodat, Arctic Drilling AS, mii árabut dán čavčča oaččui stuora kontrávtta Nussir ASA:in, lea hui duhtavaš go Birasdirektoráhtta lea addán ruvkeálggahanlobi Riehpovuonas Fálesnuoris.
– Midjiide gal ledje dat hui buorit ođđasat, lohká Arctic Drilling beaivválaš jođiheaddji Roy Karlsen.
Diehtá vuostehágu birra
Karlsen lohká gullan dan garra vuostehágu mii lea ruvkeálggaheamis Fálesnuoris, ja jáhkká dat lea ollu diehtemeahttunvuohta.
– Nussir ASA jođiheaddjit ánssášit rámi go leat bargan garrasit ja gulahallan juohkelágan beliiguin dán áššis, eaige leat vuollánan. Go dál Birasdirektoráhtta dohkkehii álggaheami, de lea dárkilis vuođđu biddjon ovdan. Ruvkedoaimmat dieđusge guđđet luottaid lundui, muhto dás lea plánejuvvon tunealladoaibma mii dáhpáhuvvá vári siste, mii dagaha unnimus lági mielde luottaid lundui. Dárkilis váikkuhusguorahallamis, masa Nussir ASA lea bidjan ollu miljovnnaid, leat boahtán ovdan eanaš váikkuhusat, ja čájeha ovdamearkka dihte ahte mearradeponiija gánnáha ovdalii gáddedeponiija, lohká son.
Loga maid: – Ruvkedoaibma ovdánahttá suohkana
Loga maid: – Váidalahtti go presideanta ii namuhan Nussirášši Parisas
Bisttášii bargu
Roy Karlsen muitala sis lea dál kontrákta miessemánnui boahtte jagi, ja dál lea sis vejolašvuohta oažžut guhkiduvvot dan.
– Ii leat dieđusge daddjon vuos ahte min fitnodat oažžu guhkiduvvot barggu, muhto go dál leat Nussir ASA ožžon álggahanlobi, de lea vejolaš bargu midjiide ollu jagiid ovddasguvlui. Dat mearkkašivčče ahte min logi guovdageaidnulažžii, geat dál leat barggus, bisttášii bargu, lohká son ja atná dan positiivan Guovdageainnu suohkanii maid go ássiin lea bargu.
Kártejit minerálaid
Karlsen muitala sin bargu lea kártet minerálaid ja gávdnat gokko minerálasuonat mannet.
– Mii bovret várrái ráiggiid, ja nu gávdnat man čiekŋalasas, ja guđe guvlui minerálasuotna manná. Mii bargat dego dakkár ovdagihtii barggu, vai de ruvkefitnodagat dihtet gokko galget bohkat, lohká son.
Fitnodat lea maŋemus guhtta jagi bargan Svalbardas, kárten minerálaid nu go oljju ja koala ruvkefitnodagaid ovddas, ja leatge dál sirdán doaimmaid Nussirii.
