Globenii leat olu norgalaččat boahtán čuovvut Agnete, ja sii jáhkket Agnete beassat finálii.
Globenii leat olu norgalaččat boahtán čuovvut Agnete, ja sii jáhkket Agnete beassat finálii.
Erik Njuolla Vangdal, Hardangeris eret, lea okta dain olu norgalaččain geat leat boahtán Globen Arenai Stockholmii čuovvut Agnete Johnsena.
– Mu eadni lea sápmelaš ja mun lean váldán mielde sámeleavgga go dál lea vuosttaš geardde lohpi fáiput sámeleavggain Eurovisionas, muitala Njuolla.
Erik jáhkká Agnethe beassat finálii:
– Muhto jáhkán dat lea jur dan alde ahte beassá, soaitá gávccádin dahje ovccádin dan logis geat besset viidásat finálii, árvvoštallá Eurovision berošteaddji Ávvirii.
Jus finálii beassá de jáhkká Agnete gártat logi buoremusa searvái.
Olggobeale Globena lea huikkas ja olbmot leat buorre mielas ovdalaš go otná Eurovision Song Contest oassefinála álgá.
Govven: Silje Malene Varsi
Anne Vik, Tromssas eret lea maid mátkkoštan Stockholmii čuovvut Agnete, maiddái sus lea sámeleavga mielde.
– Mun gal jáhkán Agnete kvalifiseret finálii, áibbas sihkkarit logi buoremusa searvái.
Son lohká ahte jus Agnete vuoitá finála de sávašii boahtte jagi Eurovisiona lágiduvvot Davvi-Norggas.
– Mun diehttelasat sávašin Tromsii finála, čaibmá Vik.
