Sámi allaskuvlla rektora Laila Susanne Varsa mielas lea ráđđehus bures vuhtii váldán daid evttohusaid maid Sámi allaskuvla lea ovddidan.
Ráđđehus almmuhii mannan vahku stivrendieđáhusa «Meld. St. 19 (2020-2021) Styring av statlige universiteter og høyskoler», mii váikkuha dasa mot universitehtat ja allaskuvllat galget stivrejuvvot boahtteáiggis.
– Mii háliidit ahte ráđđehus galgá eambbo vuhtii váldit iešguđet ásahusaid erenoamášvuođaid, ja luohttit eambbo dasa ahte ásahusat ieža máhttet vuoruhit ja čuovvut njuolggadusaid ja politihkalaš mearrádusaid. Sámi allaskuvla lea okta dain unnimus allaskuvllain Norggas, ja midjiide lea stuora ovdamunnin go ráđđehus dál cealká ahte sii áigot eambbo ávkki atnit ovdánahttinšiehtadusas mii mis lea Máhttodepartemeanttain. Allaskuvllas leat buorit vásáhusat ovdánahttinšiehtadusain, ja mii sávvat lagat gulahallama departemeanttain vai mii olahit iežamet mihtuid ja allaskuvla beassá ovdánit, dadjá allaskuvlla rektor Laila Susanne Vars preassadieđáhusas.
– Áidna maid váillahan
Dieđáhusas lea oassi mii gieđahallá dálá dili, ja das čilgejuvvo Sámedikki rolla Sámi allaskuvlla ektui. Muhto dan birra ii leat daddjojuvvon mihkkege dan oasis mii gieđahallá boahtteáiggi.
– Áidna maid váillahan dán dieđáhusas lea go ii daddjojuvvo čielgaseappot makkár rolla Sámedikkis galgá sámi alitoahpahusas ja dutkamis boahtteáiggis, ja danin livččii dárbu dan beali čielggadit dieđáhusa viidásit meannudeamis, dadjá Sámi allaskuvlla rektor loahpas.
