Boazobeatnagis lea áiggiid čađa leamaš sierra sadji bearrašiin, ja dál lea vuosttáš girji almmuhuvvon mas boazobeatnagat leat guovddážis.
Johkamohki juovlamárkaniin mannan bearjadaga almmuhuvvui girji beatnaga birra man Anna Kuhmunen ja Leila Nutti leaba čállán. Lea vuosttaš girji boazobeatnaga birra mii almmuhuvvo.
– Munnos leat boazobeatnagat, muhto váillaheimme dánlágan girjji. Girji mii lea dušše boazobeatnagiid birra ii leat gávdnon ovdal, lohká Nutti.
Govva: Carl-Johan Utsi
Árbevirolaš máhtu seailluhit
Če-girjái leat árbevierut čohkkejuvvon maid vuorraset sámit leat muitalan dan gelbbolašvuođas mas lea alla árvu ja dehálaš eallinbirgen. Boazobarggut ovdánit áiggi mielde, earenoamážit mohtorfievrruid bokte. Birge go dálá vázzi šat mohtorfievrruid haga, ja makkár boahtteáigi lea boazobeatnagis, ja dasa leaba girječállit vástádusa ozus.
– Munnuide lea dehálaš seailluhit dan árbevirolaš máhtu mii gávdno dán áššis, dadjá Leila Nutti ja lohká iežaska bargan guokte maŋemus jagi girjjiin.
Girječállit Kuhmunen ja Nutti ássaba ieža Johkamohkis, ja leaba jearahallan birrasii 40 sápmelačča, geat orrot iešguđet báikkiin Sámis. Girjjis muitaluvvo ealli sámi beanakultuvrra birra.
Boazobarggu perspektiivas
– Če lea davvisámegiel čurvestat mainna gohčču beatnaga boahtit. Girjjis leat cealkagat, čállosat ja ollu govat mat čájehit movt beatnaga ja beanaeaiggáda oktavuohta lea boazobarggu perspektiivvas, čilgejuvvo Leila Nutti neahttasiiddus.
Ávki AB girjelágádus Jielleváris lea deaddelan 3000 girjji. Eanaš oassi girjjis lea ruoŧagillii, ja oasit leat jorgaluvvon sámegillii ja dárogillii. Girjji sáhttá diŋgot neahtas, nu go Stoorstålka siiddus, go ii gávdno oastit Norgga beale gávppiin.
