Pandemiija ii bisset olbmuid vázzimis meahcis.
Marit Sarri lea Giebmegáissi duottarstobu hoavda ja lohká ahte dán geasi turistenáigodat lea álgán hui bures.
– Mis leat juo ollu olbmot leamaš dáppe, ja oallugat leat diŋgon sajiid ovddosguvlui. Mis leat dál leamaš eambbo olbmot go dábálaččat lávejit geassemánus.
Duottarstobu hoavda vásiha ahte meahccevázzin geasuha eanet ja eanet olbmuid, eandalii Ruoŧa alimus vári luhtte, Giebmegáissi. Jagis jahkái lassánit guossit, ja son jáhkká dat lea dan dihte go olbmot leat eambbo diđolaččat dálkkádaga ektui ja dan vuođul árvvoštallet makkár mátkkiid lea buoremus dahkat go leat luomus.
Koronapandemiija ii leat bissehan olbmuid boahtimis Giebmegáissi duottarstohpui.
– Mii sávvat ahte šaddá ain fiinna geassi ja ahte min guossit dovdet iežaset oadjebassan min duottarstobus. Min mihttu lea čuovvut mearrádusaid maid eiseválddit leat mearridan pandemiija ektui, buohkat galggašii bissut dearvvašin ja mis ii galgga leat gárži dáppe, dadjá Sarri Sameradion & SVT Sápmái.
