Trygg Trafikk lohká dál go lea uhcán johtolat geainnuid alde ja johtolatskuvllat gitta, de addá dat vejolašvuođa dálu nuora hárjehallat biillain vuoddjit.
Trygg Trafikk dáhkádusásahus rávve preassadieđáhusa bokte váhnemiid ahte jus hárjehat dálu nuoraid biillain vuodjit dál go leat uhcán biillat geainnuid alde, de berrejit diehtit muhtin áššiid ovddalgihtii.
– Dábálaččat rávvet mii fitnat johtolatskuvllas ovdal go hárjehallagoahtá ruovttus biillain vuodjit. Muhto mii oaidnit seammás nu mo dilli dál lea, de sáhttá leat ávkkálaš hárjehallat váhnemiiguin biilla vuodjit, lohká Trygg Trafikk seniorneavvu Bård Morten Johansen.
Vai hárjehallan lea dorvvolaš, de lea dehálaš muitit sihke váhnemiid ja mielčuovvuid, sihke ovdal ja vuojedettiin. Mielčuovvu galgá leat badjel 25-jahkásaš ja sus galgá leamaš dohkkehuvvon vuodjinkoarta vihtta jagi dan vuojánšlájas masa oahppi lea oahpahallamin.
– Muitte ahte hárjehallanbiillas galgá L-galba biilla maŋŋegeahčai darvvihuvvon, vai earát dihtet ahte lea umáhttu olmmoš hárjehallamin. Biillas galgá liigespeajal mielčuvvui. Gáibiduvvo olu gierdevašvuohta guktuin ja lea dehálaš ahte guktot leaba gozuid alde. Ovdal go vuodjigoahtá, oahpat nuorra olbmui mo biila doaibmá, masa galgá bidjat fuomášumi ja masa ii. Sihkarvuohta lea dehálamos. Hárjehala vuodjit gos lea uhcán johtolat. Čuovo dárkilit mielde. Čilge oahppái maid vuorddát, man guhkás vuodjibeahtti ja maid dán vuoru hárjehallabeahtti, čállá Trygg Trafikk.
