Riikkaidgaskasaš Sámi Filbmainstituhttii (ISFI) lea evttohuvvon masá 0,6 miljovnna ruvdnosaš lasáhus.
Riikkaidgaskasaš Sámi Filbmainstituhttii (ISFI) lea evttohuvvon masá 0,6 miljovnna ruvdnosaš lasáhus.
Dainna leage ISFI direktevra Anne Lajla Utsi rivttes duđavaš ja lohká buorit barggut buktet bohtosiid.
Buorre gulahallan
– Mis lea buorre dialoga riikadási politihkkáriiguin, gulahallan lea hui buorre ja mis leat verddet geat barget min ovddas doppe. Seammás lea mis čielgamihttu ovddasguvlui. Viđá jagi plána, dát lea ovdamunni ja buktá bohtosiid, dadjá Utsi ja joatká:
– Nubbi bealli lea ahte mii sáhttit čájehit bohtosiid. Ovdamearkka dihtii «Sameblod» filbma, lea sukseassa mii máilmmiviidosaččat čájehuvvo dál. Sámi filmmain lea buorre riikkaidgaskasaš potensiála, dadjá Utsi duđavaččat.
Ulbmil buoridit doaimbandili
Bušeahttalasáhusa lea vejolaš geavahit Riikkaidgaskasaš Sámi Filbmainstituhta doibmii ja sámi audiovisuála buvttademiid juolludemiide.
– Ulbmil lea sihkkarastit Riikkaidgaskasaš Sámi Filbmainstituhttii buoret doaibmandili nu ahte lea vejolaš joatkit ja nannet sámi audiovisuála buvttademiid dahkama ja daid gaskkusteami, čállá ráđđehusa stáhtabušeahttaárvalusas.
Sámediggeráđi Ann-Mari Thomassen maid lea duđavaš ja lohká leat hui buorrin go ráđđehus lea árvalan lasáhusa filbmainstituhttii.
