Badjel 20 kilomehtera vuovdebiilaluotta buoriduvvojedje Báhčaveaileagis 2016:s liigejuolludemiid geažil.
Badjel 20 kilomehtera vuovdebiilaluotta buoriduvvojedje Báhčaveaileagis 2016:s liigejuolludemiid geažil.
FeFo eaiggáduššá vuovdebiilaluottaid Báhčaveaileagis, mii ovttasbargá eará geavaheddjiiguin Mátta-Várjjagis Báhčaveaji vuovdebiilaluottaid luoddaráđi bokte. Divodemiid vuoruhit maiddái doppe, ja maŋŋil go Sydvaranger Gruve reastaluvai háliidii luoddaráđđi áŋgiruššat divodanbarggu eambbo, čállá Finnmárkkuopmodat preassadieđáhusas.
Báikkálaš entreprenevrrat
– Vuovdeeiseválddit ohce liigeruđa Eanandoallo- ja biebmodepartemeanttas maid ákkastedje Sydvaranger Gruve reastaluvvamiin veahkehan dihte juoidá mainna bisuhit entreprenevrraid doaimma, dadjá Ole André Hestmo, FeFo meahccehálddašeaddji.
Oktiibuot 1,54 miljovnna ruvnno lea dalle geavahuvvon luottaid divodeapmái mannan geasi ja čavčča. Lea golmma geardde eanet go dábálaččat, ja leat dušše báikkálaš entreprenevrrat mat leat dahkan barggu.
Golbma stuorámus doarjaga bohte Eanandoallo- ja biebmodepartemeanttas (600 000 ruvnno), dábálaš vuovderuđain (500 000 ruvnno) ja FeFos (270 000 ruvnno). Dasa lassin leat Mátta-Várjjat Garnisona (GSV), Bajit Báhčaveaji álbmotmeahccestivra ja Mátta-Várjjaga gielda juolludan doarjaga.
Almmolaš vuovderuđat leat mearrideaddjin, ja jus galgá sáhttit ohcat dakkár ruđa, de eaktuduvvo ahte lea vuovdevalljodat ja ahte vuovdedoalus lea vissis viidodat.
Beassan buorrána
– Das lea mearkkašupmi beassamii. Buohkat atnet luottaid, ja dat leat gitta dušše giđđat go muohta suddá. Dat leat deaŧalaččat mátkkoštanealáhussii, ealáhusaide ja meahcásteapmái oppalaččat, lohká Hestmo.
Divodeamit maid dahke ledje golggahagat, ravdačorgen, goivvohatráidnen, dulben, heavvalastin, ođđa mássa bidjan ja ođđa bajildusgokčasa bidjan. Áigeguovdilis luottat leat oasit Sametiluotta, Grensefossluodda, Gjøkåsluodda, Ellentjernluodda ja Malbekkluodda, ja gaska lea oktiibuot 20,7 kilomehtera.
Oktiibuot lea gaskal 150 ja 160 kilomehtera vuovdebiilaluottat Báhčaveaileagis.
Báhčaveaji vuovdebiilaluottaid luoddaráđis leat Mátta-Várjjaga gielda, Finnmárkku vuovdedoallohoavda, Mátta-Várjjat Garnisona (GSV), Bajit Báhčaveaji álbmotmeahci stivra, Báhčaveaileagi bivdi- ja guolásteaddjisearvi, Báhčaveaileagi ealáhusráđđi ja boazodoalloorohat 5A/5C, ja dasa lassin FeFo.
