Nie leat sánit Sámás Muinna 2 ođđa kampánnjalávlagis. Dáinna lávlagiin ja ođastuvvon sátnelisttuin loahpahit doaimmaideaset.
Kampánnjalávlla ja sátnelistu leat maŋimuš doaimmat maid giellakampánnja čađaha. Lávlaga beassat gullat vuollelis dás.
Sámásmuinna/sámástamujna/sámásthmujna/saemesthmunnjien2 giellakampánnja Ruoŧa bealde lea birrasii ovcci mánu bargan sámegiela čalmmustahttimiin sosiála mediain ja leat ráhkadan deaivvadansajiid nuoraide.
– Sávvet šaddat hitan
Lávlla ja sátnelistu leat kampánja maŋimuš buktagat, maiguin loahpahit doaimmaideaset.
Sátnelistu lea ođastuvvon Norgga beale sámáskampánjas ja hápmi lea maid ođastuvvon.
Giellaambassadevrrat leat ođđajagemánus ovttasráđiid Pávva Pittjain ja Frithiof Stenvallain ráhkadan lávlaga.
Sániid leat ambassadevrrat ja Pávva Pittja čállán, buvttadeaddjit leaba Frithiof Stenvall ja Pávva Pittja.
– Giellaambassadevrrat loahpahit doaimmaideaset, muhto giellaguovddáš áinnas sávvá sámegielaid ain geavahuvvot sosiála mediain. Doppe soaitá sátnelistu leat ávkkálažžan. Min jurdda kampánnjalávlagiin lea ahte dat galgá guldaluvvot buot oktavuođain. Mii sávvat dán šaddat Sámi coolamus hitan 2017:s, lohká Marit Kuhmunen Blom, guhte lea prošeaktajođiheaddji.
(Ášši joatká gova vuolábealde)
– Prošeakta ollašuvvan
Lávlla lea sámegiela geavaheami dehálašvuođa birra, ja ahte lea dehálaš fievrredit giela buolvvas bulvii ja ahte dasa dárbbašuvvojit buohkat.
Giellaambassadevrrat leat áŋgiruššan olu dán ovddas.
– Mii giellaguovddážis oaidnit ahte prošeavtta ulbmilat leat ollašuvvan ja sávvat ahte sámegiella ain joatká leavvamis sosiála mediain, lohká Kuhmunen Blom.
Guldal lávlaga dás: