– Dáiddalaččat, ekonomalaččat ja organisatuvrralaččat lea dán jagi festivála bures lihkostuvvan. Mii leat vásihan nanu doarjaga dán jagáš festiválagussiin, lohká feastariemuid direktevra Maria Utsi.
– Dáiddalaččat, ekonomalaččat ja organisatuvrralaččat lea dán jagi festivála bures lihkostuvvan. Mii leat vásihan nanu doarjaga dán jagáš festiválagussiin, lohká feastariemuid direktevra Maria Utsi.
Davvi-Norgga feastariemut, mat lágiduvvojedje 54. geardde, leat vuovdán ollu bileahtaid ja dinen 2,5 miljovnna ruvnno.
Birrasii 250 doalu leat lágiduvvon ja badjel 700 artistta leat leamaš mielde.
Sullii 30 000 geahčči leat vásihan dáidagiid, ságastallamiid ja fágalaš sisdoalu gávcci beaivvis, čállá Davvi-Norgga feastariemut preassadieđáhusas.
Golbma stuora diŋgojuvvon dáhpáhusa
Feastariemuin ledje 20 vuosttaščájálmasa musihkas ja lávdedáidagis.
Dán jagáš prográmmas ledje maid golbma stuora musihkalaš diŋgondáidaga; Solnatt – Beaiveidja, 3 geardde Bremnes: Eternitt ja RO/URO maid Marthe Valle ovdanbuvttii.
– Dán golmma diŋgondáidagis lei musihkalaš fápmočájáhusa. Mihttu lea movttiidahttit eanet hutkkálašvuođa ja ahte min davvi historjját muitaluvvojit eanet go ovdal, lohká duhtavaš feastariepmodirektevra preassadieđáhusas.
Feastariemuid profiila
Joar Nango, gii lei feastariemuid profiila, hástalii dáidaga rájiid go geahčadii sámi huksenvieruid ođđaáigge perspektiivvas. Oassin su prošeavttas lei ásahit sámi arkiteaktasearvvi, mii lea vuosttaš sámi arkiteaktasearvi.
Son huksii maid nomádalaš gumpi Hárstták guovddážii, ovttas eará Sámi dáiddáriiguin ja giehtačehpiiguin. Gumppis galget leat girjjit ja doaibmat girjerájusin gos sáhttá ságastallat ja digaštallat.
– Dán jagáš profiilaprošeakta rabai ođđa dialogaid sámi servvodatovdánahttimis. Dehálaš gažaldagat leat movt arkitektuvra ovddida min ja bidjá eavttuid ipmirdit min iežamet ja boahtteáiggi. Ii goassege ovdal leat sámi arkitektuvra digaštallojuvvon dán ládje, lohká Utsi.
Mánáidriemut
Maiddái mánáide ledje sierra riemut prográmmas, ja čájálmasat mat ledje heivehuvvon nuoramus mánáide gitta stuorimus mánáide.
Mánáid feastariemuin ledje bargobájit ja čájálmasat.
– Mii beroštit ahte mánát galget beassat vásihit dáidagiid ja kultuvrra mas lea alla kvalitehta, ja mas Davvi-Norgga SeastinBáŋku oastá buot mánáidbileahtaid, nu ahte čájálmasat leat nuvttá mánáide geat leat vuollel 12-jahkásaččat, lohká Utsi.
Ollu rápmi boahtán
Badjelaš čuođi eaktodáhtolačča leat dan gávcci beaivvi ijatbeivviid bargan bileahttavuovdimiin, fievrredemiin, huksemiiguin, artisttaid veahkehemiin ja muđuid guossohemiin, mii lea máhcahan rámálmas dieđuid ruovttoluotta sihke gehččiin ja artisttain.
Boahtte jagi almmuhit Davvi-Norgga feastariemuid lágidit geassemánu 22. beaivvis 29. beaivái.
