-Almmuhus-
-Almmuhus-
OĐĐASAT Buollin­stašuvnnain ii šatta rabas­beaivi – Dollet njuolggo­sáddaga

Buollin­stašuvnnain ii šatta rabas­beaivi – Dollet njuolggo­sáddaga

-

-

Lávvordaga čakčamánu 19. beaivvi livččii galgan buollinstašuvnnaid rabas beaivi, gos mánát livčče beassan earret eará čuvvodit čáskadanbiillaid. Das ii šatta mihkkege dán jagi, go koronapandemiija geažil leat šaddan earáládje lágidit beaivvi. 

Dan ovdii go rabas beaivi šluhttejuvvo, de leat sii hutkan čađahit njuolggosáddaga Facebookas ja YouTubes man duhkorasguovža «Brannbamsen Bjørnis» láidesta dii. 11 rájes lávvordaga čakčamánu 19. beaivvi. Sáddagii servet máŋga buollinstašuvnna ja geahččit besset hárjehallat jáddadit dola, gádjut ráidalasbiillain, geahččalit jáddadanbohcci ja leat maid olu eará suohttasit. 

– Go mii ipmirdeimmet ahte eat sáhte albma rabas beaivvi lágidit, de mii jođánit fuobmáimet ahte fertet lágidit molssaevttolaš fálaldaga mánáide geat leat illudan dan beaivái. Brannbamsen Bjørnis galgá láidestit sáddaga váldobuollinstašuvnnas Troandimis, ja de beassat vel guovlalit eará buollinstašuvnnain miehtá riikka. Mii jáhkkit ja sávvat dan leat buorren buhtadussan go eai beasa fysalaččat boahtit rabas beaivái, lohká Mari Bræin Faaberg, guhte lea Norgga buollinsuodjalussearvvi jođiheaddji ja buollinsuodjalusvahkku ja Bjørnis-prošeavtta prošeaktajođiheaddji. 

Ulbmil eastadit buollima

Dat árbevirolaš buollinsuodjalusvahkku lágiduvvo 38. vahkku juohke jagi, mas lea ulbmil eastadit buollima viesuin. Stohkosiid, oahpu ja duohtavuođa bokte oahpahit sihke mánáid ja boarráset olbmuid man várálaš dolla lea go dál boahtá áigodat go buollinlohku lassána. 

– Brannbamsen Bjørnis lea buollindoaimmahaga deháleamos bargoneavvu go mii deaivvadit mánáiguin, ja rabas beaivi buollinsuodjalusvahkku lea dehálaš beaivi midjiide go de beassat deaivvadit nu olu mánáiguin ja bearrašiiguin. Dat ahte mii beassat lágidit rabas beaivvi digitálalaččat lea dehálaš vai mii olahit buollinsuodjalusmáhtu mánáide ja bearrašiidda, lohká Trøndelága buollin- ja gádjunbálvalusa buollinkonstabel Rikard Heimen.

- Advertisement -
-Almmuhus-