Buollinčáskadanásahusas lea dehálaš rolla servodagas ja lea áibbas dárbbašlaš ahte doalaha buori gearggusvuođa. Buollinsuodjalansearvi lea iskan mo iešguđet buollinčáskadeaddjit fuolahit gearggusvuođa, mo garvet dávdda njoammumis bargovehkii ja mo dát váikkuha doibmii.
Norgga buollinčáskadeaddjit leat mearridan ahte heaittihit buot dárbbašmeahttun galledemiid ja geahččamiid. Buollinčáskadanásahus geahččala maid geahpedit buot dárbbašmeahttun gohččumiid ja fuolaha dušše heaggagádjundoaimmaid lassin dábálaš buollinčáskademiide. Dan dahká garvin dihtii ahte buollinčáskadanvehkii njoammu korona njoammodávda dahje ahte biddjojit errenáigái.
Sii árvvoštallet dađistaga makkár riskkat leat čadnon iežaset bargguide, sihkkarastin dihtii ahte sáhttet áimmahuššat servodahkii dehálaš doaimmaid. Čoahkkinastin lea gaskaboddosaččat heaittihuvvon, olusiin lea ruovttukantuvra ja iešguđet fáktavuoru joavkkut eai galgga deaivvadit.
Várrugasrávvagat olbmuide
Norsk brannvernforening hálddahuslaš direktevra Rolf Søtorp rávve olbmuid leat erenoamáš várrugassan dán korona-áiggis.
– Ále guođe kintaliid buollit, ále cokka badjelmeare muoraid uvdnii ja ále guođe uvnna elrávnnji ala go leat málesteamen. Ále bija makkárge elrávdnjeapparáhtaid johtui ihkku, ii lihttebassanmašiinna, ii bivttasgoikkadanmašiinna ge. Dárkkis ahte suovvaalárpma ja buollinčáskadanapparáhtat doibmet. Buohkat sáhttet leat mielde dan fuolaheamen, lohká Søtorp,
Doaimmat mat leat gaskaboddosaččat heaittihuvvon
Son čilge ahte sin mihttomearri lea bisuhit servodahkii dehálaš bargguid ja vuordit daid bargguid dahkamis mat eai dárbbaš justa dál doaibmat. Dáid doaimmaid eai doaimmat korona njoammudávdda dihtii:
Eai váldde vuostái gussiid buollinčáskadanviesus, eai fina geahččamin, eaige fina ruhttemin viesuid suovvabohcciid, eará geahččamiid árvvoštallet, stuorát čoahkkimat, seminárat ja kurssat eai lágiduvvo. Dušše heakkagádjundoaimmaid lassin dábálaš buollinčáskadeami dahkkojuvvojit.
