Dálvi dán rádjái čájeha gaskamearálaš temperatuvrra leat 2,3 proseantta bajábeale mii láve normála miehtá riikka. Dálveáigodat lea 20 bivvaleamos dálvviid gaskkas mii lea mihtiduvvon 1900 rájes.
Stuorimus erohusat ledje Lulli-Norgga váriin, gos lei njeallje gráda bajábealde normála.
Moatti stašuvnnas Romssas lei gaskamearálaš temperatuvra bajábealde normála. Borga ja arvi lei 120 bajábeale normála .
Muhtin stašuvnnat Østlánddas, Nordlánddas ja Finnmárkkus mihtidedje 200-300 bajábeal normála arvvi ja borgga.
Máŋga stašuvnna Vestlánddas mihtidedje ges 50 proseantta arvvi ja borgga go mii lea dábálaš.
Bivvalat ja buollašat
Bivvaleamos gaskamearálaš temperatuvra mii mihtiduvvui lei Ytterøyane fyr, Sogn ja Fjordane fylkkas gos lei 5,1 gráda bivval dán dálvvi. Dat lea 2,2 gráda bajábeale normála.
Buollašeamos báikkit ledje Finnmárkku duoddaris. Kárášjogas mihtiduvvui gaskamearálaččat 15,3 buolašceahki, mii lea 0,6 gráda bajábeale normála.
Guovdageainnus lei 14,4 buolašceahkki dat gaskamearálaš temperatuvra, ja Šihččajávrris ges 14 gaskamearálaš buolašceahki.
Čoavddatmohkis mihtiduvvui buollašeamos temperatuvra olles dálvvis, go čájehii 42,2 buolašceahki ođđajagemánu 28. beaivvi.
