– Buohkat háliidit fámu

Porsáŋggu dálá várresátnejođiheaddji ja Olgešbellodaga várresátnejođiheaddjievttohas Reidunn Hesjvik muitala iežaset geavahan 100 miljovnna kruvnna dán áigodagas mánáide ja nuoraide.

– Mii leat ođasmahttán skuvlla, ja láhčán dilli, seammás go leat huksen ássanviesu ohppiide, lohká son.

Hesjvik lohká sin ulbmil lea ain ovdánahttit gieldda ja vuoruhit ášši mii boahtá Porsáŋggu gildii buorrin, muhto maiddái olles Finnmárkui.

– Mii dieđusge háliidat doalahit fámu, ja bargat dan nammii ahte oažžut jienasteddjiid luohttámuša, lohká Hesjvik.

Opmodatvearru báhcán

Reidunn Hesjvik lohká okta ášši lea báhcán ja dat lea opmodatvearru, muhto eai leat vuollánan ja lea okta váldoáššiin maiddái boahtte áigodagas.

– Min ulbmil lei heaittihit opmodatvearu, muhto dan eat leat nagodan go ii leamašan gieldastivrra eanetlohku áššis. Seammás áigut bargat ahte gielddas galgá buore ekonomiija, eat ge leat vuollánan opmodatvearuin. Min áigumuš lea ahte dat galgá vuoliduvvot 2017:s, lohká son.

Ii duostta addit lohpádusaid

Olgešbellodaga válgaprográmma ii leat vel gárvvis, nu ii loga Reidunn Hesjvik iežas vel duostat addit lohpádusaid.

– Muhto bellodaga ulbmil lea joatkit buoridit skuvlla, ja ahte gielda galgá leat geasuheaddji ássansadji, ja maiddái ealáhusaid ovdánahttit. Mii galgat leat ealáhusbellodat seammás go guldalat álbmoga, lohká son.

Nannet kultuvrra ja giela

Reidunn Hesjvika hállu lea nannet kvena- ja sámegiela ja -kultuvra.

– Lea dehálaš ášši, ja lea dehálaš nannet kultuvrra. Skuvllat barget dainna ja skuvla lea ge deháleamos arena nannet giela ja kultuvrra, lohká son.

Ávvir ii leat fidnen ságaide Porsáŋggu dálá sátnejođiheaddji ja Olgešbellodaga sátnejođiheaddjievttohasa Knut Roger Hanssena.

Ášši almmuhuvvui vuosttaš geardde 16.04.2015