28 vuolleahkásaš dorvoohcci šadde evakueret go buollái dorvoohcciguovddážis Giebustu báikkis Leaŋgáviika suohkanis Romssas. Ii okta ge roasmmohuvvan buollimis.
Buollin álggii ovtta visttis mii lea dorvoguovddáža lahka, čállá Nordlys aviisa. Okta fitnodat láigoha vistti, ja buollin álggii gealláris.
Suovvabuokčit iske dorvoguovddáža, ja guovddáža ássit fertejedje fárret hotellii idjii, dieđiha Romssa politiijaguovlu.
– Idjavákta fuomášii buollima go buollinalárbma čuodjagođii, muitala guovddáža jođiheaddji Heidi Hilmarsdottir Hansen NRK:i.
Čáskadedje jođánit
Diehtu buollima birra bođii duorastaga ija.
Birrasii 40 minuhta maŋŋel ledje nagodeame bissehit buollima, ja diibmu 02.15 dieđihii politiija ahte buollin lei čáskaduvvon. Sii eai dieđe manne buollái.
Dorvoohcciguovddážis orrot nuorra, vuolleahkásaš dorvoohccit, čállá Folkebladet.
