Gaskavahkku ja duorastaga sáddejuvvojit badjel njealje milijovnna sms-dieđu Smittestopp áppa geavaheami birra.
Smittestopp áppa bokte sáhttá oažžut dieđu jus lea leamaš muhtuma lahka geas lea koronadávda. Áppas sáhttá maid ieš dieđihit jus alddis lea koronadávda.
– Lea earenomáš dehálaš ahte buohkat geat atnet Smittestopp áppa dieđihit dohko jus leat ožžon positiiva iskkusbohtosa, dadjá FHI.
– Mii vuordit stuora njoammunlassáneami vahkkuid ovddosguvlui, ja dál galgá juohkehaš bargagoahtit eambbo njoammunguorahallamiin ja dieđihit njoammuma lagasoktavuođaide. Smittestopp áppa bokte beassá dasa lassin dieđihit njoammuma birra eará lagasoktavuođaide, olbmuide geaid it dovdda. Don oaččut ieš nai dieđu jus leat leamaš muhtuma lahka geas lea koronadávda, dadjá FHI direktevra Camilla Stoltenberg.
Doaibmabidju
Go galgá dieđihit njoammuma birra áppas de ferte vuos ožžon positiiva iskkusbohtosa iskkusguovddážis ja galgá maid leahkit registrerejuvvon Dieđahusvuogádagas njoammudávddaide (Meldingssystem for smittsomme sykdommer MSIS).
– Mis ii leat vejolašvuohta bissehit njoammubáru mii dál boahtá ovddosguvlui, muhto mii sáhttit goazahit dan báru doaibmabijuiguin. Smittestopp áppa lea okta dakkár doaibmabidju. Mađi eambbosat geavahit Smittestopp áppa, dađi eambbo doaibmil dat šaddá ja danne mii ávžžuhit buohkaid dan váldit atnui, dadjá Stoltenberg preassadieđáhusas.
