Hámmárfeastta buohcceviesus leat 120 bargi biddjon erremii. Dál áigot iskat buot bargiid.
Duorastaga duođaštuvvui covid-19 vuosttaš olbmos Hámmárfeastta buohcceviesus. Sotnabeaivvi maŋŋelgaskabeaivvi dieđihii Hámmárfeastta gielda ahte 15 olbmos Hámmárfeasttas duođastuvvon korona. 12 dain leat buohcceviesu bargit. Birrasiid 50-80 iskkusbohtosa ledje ain vuordime.
Digitála preassačoahkkimis sotnabeaieahkeda deattuha goitge direktevra Siri Tau Ursin ahte lea dorvvolaš boahtit buohccevissui pasieanttaide geat galget dikšui. Sii leat gidden olu ossodagaid, muhto váldet bures vára dain pasieanttain geat bohtet. Dilli lea goitge duođalaš dál buohcceviesus. Sii leat ožžon bargiid veahkkin boahtit olles Davvi Dearvvašvuođa ásahusain.
– Lea váttis ja hástaleaddji dilli maiddái bargiide geaidda lea njommon dávda, ja doarjut sin dán dilis, dadjá direktevra Siri Tau Ursin.
Hearkkes dilis
Hámmárfeastta buohcceviesu klinihkkahoavda Jonas Vale Paulsen lohká sis lea dál rukses gearggusvuođadilli ja lea ain váttis oažžut oppalaš gova man viidát dávda lea njommon olbmuide buohcceviesus.
– Mii leat ain hearkkes dilis, muhto nagodit meannudit njoammuma vuos dál. Mii iskat dál olusiid ja vuordit vástádusaid iskosiin. Boahttevaš jándor čájeha makkár geainnu mii fertet válljet ain viidáseappot. Dilli sáhttá jođánit rievdat, dadjá klinihkkahoavda Jonas Vale Paulsen preassačoahkkimis.
Buohcceviesu jođiheaddjit rámidit buot bargiid buot dásiin geat áŋgirit barget čoavdit hástalusaid. Sii leat sirddašan bargiid siskkáldasat ja geahččalit dál nannet daid ossodagaid mat leat hearkkimusat, vuosttažettiin heahtedivššu.
Njoammunsuodjalan-bajitdoavttir Anne Mette Asfeldt muitala ges ahte buohccit geat galget ruoktot, galget iskojuvvot ja mannat erremii logi beaivái, jus sin sáhttá defineret lagasoktavuohtan oktiige geas lea duođaštuvvon covid-19 buohcceviesus. Das viidáseappot galget dat olbmot ruovttusuohkana divššuin gulahallat.
Lagasoktavuohta lea jus lea leamaš lagabus go 2 mehtera ja unnimusat 15 minuhta lahka olbmo geas lea duođaštuvvon covid-19, muitala son.
Riegádahttin ja borasdávdadikšu ii gidde
Vaikko eanas ossodagaid leat gidden dán dili geažil, de doalahit ain muhtin ossodagaid rabasin. Riegádahttinossodat ja mánáid ossodat jođihuvvo ain nu go ovdal, ja váldet ain buhcciid sisa.
Heahtedikšu dahje bahkadasdikšu bissu ain rabasin Hámmárfeastta suohkana ja ránnjá suohkaniid ássiide. Eará suohkaniid ássit galget heahteveahki oažžut juogo Álttá klinihkas, Girkonjárgga buohcceviesus dahje Universitehtabuohcceviesus Romssas, dárbbu ja klinihkaid kapasitehta mielde.
Sii geat galggaše poliklinihkkadiimmuide Hámmárfestii guovtti lagamus vahkkus, ožžot lagat dieđu lea go sin diibmu maŋiduvvon vai galget go eará klinihkaide, nu go Álttá klinihkkii ja Sámi klinihkkii Kárášjohkii.
Hámmárfeasta vuoruha sin váldit sisa geat galget plánejuvvon borasdávdadikšui ja čalbmesivaid dikšui.
Eai dieđe goas oppalaš gova ožžot
Buohcceviesu jođiheaddjit lohket hui váttisin diehtit goas jáhkket nagodit bissehit njoammuma.
– Lea ain beare árrat dadjat movt dat ovdána viidáseappot ja man jođánit fas šaddá dábálaš dilli. Jus sii geat mannet ruoktot erremii, buohccájit ja šaddet máhccat buohccevissui ovdamearkka dihte, de dieđusge ádjána ovdal go manná fas buori guvlui, dadjá bajitdoavttir Anne Mette Asfeldt.
Buohcceviesu jođiheaddjit eai dieđe movt dahje gean mielde dávda lea njommon buohccevissui, ja čilgejit nu leat go dávda sáhttá leamaš olbmos máŋga beaivvi ovdal go mearkkaša dávdamearkkaid, ja oallugat eai báljo fuomáš ge sis leat dávdamearkkat.
Buohcceviesus áigot dál iskat buot bargiid.
Muđui lea pasieanttaid lihkadeapmi ráddjejuvvon garrasit buohcceviesus, go eai beasa boahtit lanjain olggos.
