Ráđđehus evttoha bistevaš bušeahttalassáneami buohcceviesuide, lassin buohcceviesuid bušeahtaid erenoamáš hadde- ja bálkáheiveheapmái. Oktiibuot lea lassáneapmi 4,7 miljárdda ruvnnu.
Dasa lassin evttoha ráđđehus lasihit 1,5 miljárdda ruvnnu loatnajuolludussan. Dat mearkkaša ahte oppalaš juolludusat buohcceviesuide lassánit 6,2 miljárdda ruvnnuin reviderejuvvon nationálabušeahtas.
Buohcceviesuid 2,5 miljárdda ruvdnosaš bistevaš bušeahttalassáneapmi dieđihuvvui guovvamánus jo. Dat mearkkaša ahte lassi juolludusat mat addojuvvojedje 2022:s jotkojuvvojit. Dasa lassin ožžot buohcceviesut sullii 2,2 miljárdda ruvnnu buhtadussan jagi 2023 hadde- ja bálkágoargŋuma geažil, čállá Norgga ráđđehus preassadieđáhusastis.
Vuoruhuvvon surggiid čuovvuleapmi
Ráđđehus lohká lassáneamit addet buohcceviesuide vejolašvuođa buorebut čuovvulit jagi 2023 vuoruhuvvon surggiid ja dagahit ahte buohcceviesut sáhttet čađahit dárbbašlaš investeremiid.
– Mii leat ovdal dieđihan ahte dat lassejuolludus maid buohcceviesut ožžo mannan jagi ođđassalderemis, šaddá bistevaš juolludussan. Jagi 2023 haddegoargŋun lea leamaš stuorát go dat mii lei vuođđun dan bušehttii maid Stuorradiggi mearridii, nu ahte dát lassáneapmi dárbbašuvvo amas fertet geahpedit buhcciiddivššu ja dárbbašlaš investeremiid, dadjá dearvvašvuođa- ja fuolahusministtar Ingvild Kjerkol.
Ráđđehus oaivvilda ruđat addet buohcceviesuide buoret vejolašvuođa čuovvulit jagi 2023 stivrendokumeanttaid, mas vuoruhuvvon doaibmabijut leat psyhkalaš dearvvašvuođasuddjen ja vejolašvuohta olahit dearvvašvuođabálvalusaid johtilit. Nu mo dieđihuvvon, de gusket ođasmahttojuvvon meroštusat maiddái investerenpoasttaide.
– Erenoamáš buhtadus lea teknihkalaš rievdadus amas dárbbašit gáržžidit dan bušeahta maid Stuorradiggi mearridii juovlamánus 2022 ja daid vuoruhemiid mat ledje vuođđun mearrádussii, dadjá dearvvašvuođa- ja fuolahusministtar.
